सुराजी गांव योजना के सपना होए लगिस साकार
कबीरधाम, 28 फरवरी 2020। छत्तीसगढ़ शासन के महत्वकांक्षी योजना नरवा, गरवा, घुरवा अऊ बाड़ी ले गांव वाले मन ल अब लाभ मिले लगे हे। कबीरधाम जिला के आदर्श गौठान घोंघा विकासखण्ड बोड़ला म रविदास स्वसहायता समूह के महिला मन ह गौठान के गोबर ले वर्मीकम्पोस्ट खाद बनाके बेचत हें अउ आर्थिक लाभ कमावत हें। जानबा हे के समूह ह उद्यानिकी विभाग ल 55 क्विंटल वर्मीकम्पोस्ट 10 रूपिया प्रति किलो के भाव ले बेंचे हे। समूह के बनाए खाद के मांग शासकीय विभाग मन के संगें-संग निजी संस्थान मन तको करत हें।
रविदास महिला स्वसहायता समूह के अध्यक्ष श्रीमति विमला बाई ह बताइस के उद्यानिकी विभाग ल 55 क्विंटल खाद बेच के समूह ल करीबन 55 हजार रूपिया के आमदनी होही। कुछ समय पहिली 3 क्विंटल वर्मीकम्पोस्ट खाद बाजार म बेंचा गए रहिस, जेखर से 3000 रूपिया के लाभ पहिली मिले रहिस। समूह के सचिव श्रीमति पुष्पा बाई ह बताइस कि घोघा के गौठान म समूह कोति ले 10 क्विंटल खाद तियार करे जात हे, जऊन अवइया समय म बेंचे जा सकही।