गिधवा-परसदा जलाशय ल स्वच्छ रखे बर महिला मन उंचाईन बाना

बेमेतरा, 08 फरवरी 2021। हालेच म गिधवा-परसदा म ‘हमर चिरई-हमर चिन्हारी’ नाव ले तीन दिन के पक्षी महोत्सव के आयोजन करे गए रहिस। बेमेतरा जिला के नवागढ़ विकासखड के गिधवा-परसदा अऊ मुरकुटा जलाशय मन म जलीय अऊ थलीय प्रवासी पक्षी अकटूबर ले फरवरी महिना तक अपन डेरा डारथें। इहां के भुंइयां ल ये चिरई मन बिकट भाथें। चिरई मन ल इहां भरपूर चारा तको मिल जाथे। ये बात के जानकारी होए ले गिधवा-परसदा अऊ मुरकुटा म चिरई मन ल देखे बर पर्यटक मन तको अब आए लगे हें। इहां अवइया पर्यटक मन अपन संग प्लास्टिक के पानी के बोतल, खाए-पीए के सामान पन्‍नी ऊ लेके आथें, जेखर उपयोग करके ओ मन ओला उहें छोड़ देथें जेकर से एती-तेती कचरा बगर जाथे। चिरई मन ल बेहतर वातावरण मुहैया कराए के उद्देश्य ले गांव के महिला मन जलाशय के तीर-तखार के कचरा ल अब साफ करे लगे हें। अब गिधवा-परसदा गांव के पहिचान विदेशी चिरई मन ले होए लगे हे। लऊहे इहां ईको-टुरिज्म ल बढ़ावा देहे जाही। गांव वाले मन ह चिरई-चिरगुन ल कोनो प्रकार ले हानि झन पंहुचय ए बात के बर सावचेत हें। एती पता चले हे के मुरकुट गांव के महिला मन जलाशय के तीर के जगा ल साफ सुथरा अऊ स्वच्छ रखे के बर खुदे अपन हाथ म सफाई करे के बाना उंचा लेहे हें।