खेल विभाग के बालिका खिलाड़ी मन ह फुटबॉल स्पर्धा म बाजी मारिस

रायपुर, 28 जनवरी 2021। ऑल इंडिया फुटबॉल फेडरेशन के तत्वावधान म रायपुर जिला फुटबॉल संघ के द्वारा जिला महिला फुटबॉल लीग प्रतियोगिता के आयोजन सप्रे शाला मैदान म करे गीस, जेमां 10 टीम मन ह भाग लिस। फाईनल मैच स्पोर्टस डिपार्टमेंट ए टीम अउ जेएलएफ क्लब ए टीम के बीच आयोजित होइस। जेमां स्पोर्टस डिपार्टमेंट के प्रियंका फूटान ह एक गोल दागिस। स्पोर्टस डिपार्टमेंट के टीम 1-0 ले विजयी रिहिन। ये प्रतियोगिता म बेस्ट गोल किपर भूमिका साहू अउ बेस्ट प्लेयर के अवार्ड वंदना ध्रुव ल देहे गीस। खेल संचालक श्रीमती श्वेता श्रीवास्तव सिन्हा ह टीम के सबो बालिका खिलाड़ी, फुटबॉल प्रशिक्षक श्रीमती सरिता कुजूर टोप्पो सहित आयोजक रायपुर जिला फुटबॉल संघ ल बधाई दीन।