- औद्योगिक प्रतिनिधि मन ले निर्यात प्रोत्साहन के संभावना मन उपर करिन चर्चा अऊ ओ मन ल छत्तीसगढ़ म निवेश बर दीन नेवता
- कॉन्फ्रेंस म छत्तीसगढ़ म सस्टेनेबल डेवलपमेंट के दीन जानकारी
रायपुर, उद्योग मंत्री श्री कवासी लखमा आज अपन इंडोनेशिया प्रवास के समय उहां के बाली शहर म आयोजित G20 AVP Globle Conference म सामिल होइन। उमन उहां औद्योगिक प्रतिनिधि मन ले चर्चा करिन। श्री लखमा ह छत्तीसगढ़ म सस्टेनेबल डेवलपमेंट के होवत काम मन के बारे म विस्तार ले जानकारी दीन। उमन उहां के औद्योगिक प्रतिनिधि मन ले निर्यात संभावना मन उपर चर्चा करिन अऊ ओ मन ल छत्तीसगढ़ म निवेश बर आमंत्रित करिन। श्री लखमा ह बाली म उलुवातुमन्दिर के दर्शन तको करिन।
बाली के कन्वेंशन सेन्टर म आयोजित ग्लोबल कॉन्फ्रेंस म श्री लखमा ह नीथारलैंड बेस्ड संस्था पोर्टिकस के रीजनल डायरेक्टर सुश्री सुखमनी सेठी ले चर्चा करिन अऊ छत्तीसगढ़ म सस्टेनेबल डेवलपमेंट म होवत काम मन के बारे म विस्तार ले जानकारी दीन। उमन विशेषकर बस्तर क्षेत्र म शिक्षा म सुधार उपर अनुसंधान म बल दीन। उमन सुश्री सेठी ल अपन टीम के संग छत्तीसगढ़ आए के नेवता घलोक दीन। चर्चा के समय सुश्री सेठी ह बताइस कि दूसर प्रदेश जइसे झारखंड म पोर्टिकस पहिली ले ही काम करत हे अऊ ओखर परिणाम घलोक अच्छा आत हे।
श्री लखमा ह अमेरिका के सनफोर्ड पैक्स संस्था के एग्जीक्यूटिव डायरेक्टर सुश्री प्रिया शंकर ले घलोक मुलाकात करिन अऊ ओ मन ल छत्तीसगढ़ म चलत गोधन न्याय योजना सुराजी गांव योजना, सी-मार्ट, महात्मा गांधी ग्रामीण औद्योगिक पार्क संग कई ठन विषय मन उपर विस्तार ले जानकारी दीन। उमन सुश्री प्रिया शंकर ले राज्य म उपलब्ध लघु वनोपज उत्पाद ले ग्रामीण अर्थव्यवस्था म सुधार बर शासन कोति ले करे जात काम मन म घलोक विस्तार ले चर्चा करिन।
सुश्री प्रिया शंकर ह ग्रामीण अर्थव्यवस्था ल सुदृढ़ करे के दिशा म छत्तीसगढ़ शासन के पहल के सराहना करिन। श्री लखमा ह ओ मन ल छत्तीसगढ़ आए के नेवता दीन। जेखर से कि शिक्षा म अनुसंधान अऊ सामाजिक आर्थिक उन्नति म उंखर संस्था के सहयोग लेहे जा सकय।
जानबा हे कि उद्योग मंत्री श्री कवासी लखमा के अगवाई म जी-20 एव्हीपीएन ग्लोबल कॉन्फ्रेंस म भाग लेहे बर छत्तीसगढ़ के उच्च स्तरीय प्रतिनिधि मंडल एक हफ्ता के इंडोनेशिया के दौरा म हे। प्रतिनिधि मंडल म उद्योग विभाग के सीएसआईडीसी के प्रबंध संचालक श्री अरूण प्रसाद अउ वरिष्ठ अधिकारी सामिल हें।
