रायपुर, 13 जुलाई 2020। आज मुख्यमंत्री श्री भूपेश बघेल ह कहिन के गोधन न्याय योजना के क्रियान्वयन म कलेक्टर मन के भूमिका बहुत महत्वपूर्ण होही। मुख्यमंत्री आज इहां अपन निवास कार्यालय म आयोजित बैठक म गोधन न्याय योजना के क्रियान्वयन बर करे जात तैयारि मन के समीक्षा करत रहिन। मुख्यमंत्री श्री बघेल ह बैठक म कहिन के जऊन गौठान मन म अब तक गौठान समितियां नइ बने हे, उहां गौठान समिति मन के गठन तुरंते करे जाए। गौठान समिति मन के गठन प्रभारी मंत्रि मन के अनुमोदन ले करे जाए। उमन कहिन के योजना म गांव के चरवाहा मन ल अनिवार्य रूप ले भागीदार बनाए जाय। ओ मन ल वर्मी कम्पोस्ट के बिक्री ले होवइया लाभांश के एक हिस्सा मिलय।
मुख्यमंत्री ह कहिन के गोधन न्याय योजना के अंतर्गत गांव मन म गोबर खरीदे के काम गौठान समिति मन ह करहीं। गौठान मन म महिला स्व-सहायता समूह अऊ युवा समूह कोति ले वर्मी कम्पोस्ट बनाए के काम करे जाही। अइसनहे वर्मी कम्पोस्ट के भंडारण बर गौठान मन म कमरा निर्माण करे जाए। मुख्यमंत्री ह कहिन के गौठान मन म अवइया पशु मन बर हरियर चारा के व्यवस्था घलोक सुनिश्चित करे जाय। उमन वर्मी कम्पोस्ट के पैकेजिंग बैग म वर्मी कम्पोस्ट उत्पादित करइया गौठान समिति के नाम घलोक प्रदर्शित करे के निर्देश दीन।
श्री बघेल ह गौठान मन म गौ-सेवक मन ल जोड़े अऊ उहां पशु चिकित्सक मन के भ्रमण सुनिश्चित करे के घलोक निर्देश दीन। उमन कहिन के स्व-सहायता समूह मन ल वर्मी कम्पोस्ट निर्माण बर इंदिरा गांधी कृषि विश्वविद्यालय, कृषि विज्ञान केन्द्र के माध्यम ले प्रशिक्षण देहे जाय। ये काम म एनजीओ ल घलोक जोड़े जा सकत हे। मुख्यमंत्री ह ग्रामीण क्षेत्र मन के संगें-संग शहरी क्षेत्र मन म घलोक गोधन न्याय योजना ले क्रियान्वयन बर जरूरी तैयारी करे ल कहिन। उमन कहिन के शहरी क्षेत्र मन म स्थापित निजी डेयरी मन ले घलोक गोबर के खरीदी करे जाय अऊ वर्मी कम्पोस्ट निर्माण म शहरी क्षेत्र के महिला समूह मन ल जोड़े जाय।
बैठक म कृषि अउ जल संसाधन मंत्री श्री रविन्द्र चौबे, मुख्य सचिव श्री आर. पी. मण्डल, मुख्यमंत्री के अपर मुख्य सचिव श्री सुब्रत साहू, प्रमुख सचिव पंचायत अउर ग्रामीण विकास श्री गौरव द्विवेदी, प्रमुख सचिव वन श्री मनोज पिंगुआ, कृषि उत्पादन आयुक्त डॉ. एम. गीता, मुख्यमंत्री के सचिव श्री सिद्धार्थ कोमल सिंह परदेशी, सहकारिता विभाग के सचिव श्री प्रसन्ना आर., नगरीय प्रशासन विभाग के सचिव श्रीमती अलरमेलमंगई डी., प्रधान मुख्य वन संरक्षक श्री राकेश चतुर्वेदी, मुख्यमंत्री के ग्रामीण विकास सलाहकार श्री प्रदीप शर्मा उपस्थित रहिन।