आजीविका के संग संग आर्थिक रूप ले होवत हें सशक्त
जांजगीर-चांपा, 12 अगस्त 2024। छोटे-छोटे स्वरोजगार ल अपनाके मनखे आर्थिक रुप ले आगू बढ़त हें अऊ अभी हाल समय म मनखे मन के रुझान बकरीपालन कोति तेजी ले बढ़त जात हे। राज्य सरकार घलोक स्वरोजगार ल प्रोत्साहित करे के काम करत हे। अइसन म छत्तीसगढ़ के ग्रामीण अंचल के किसान बकरीपालन करके अपन सफलता के नवा कहानी गढ़त हें अऊ मनखे मन बर नवा मिसाल बनत हे। अइसनहे हरदीविशाल के रहइया कांशीराम अपन किस्मत ल दूसर मन के भरोसा म न छोड़ के बदलत समय के संग अपन ल मजबूत बनाइस अऊ अपन मेहनत के बल ले अपन किस्मत ल बदल दीस।
जांजगीर-चांपा जिला के बलौदा विकासखण्ड के ग्राम पंचायत हरदीविशाल निवासी कांशीराम अपन परिवार चलाय बर अपन खेती-किसानी उपर ही निर्भर रहिस अऊ अपन परिवार के गुजारा चलात रहिस। एखर अलावा वोखर आय के कोनो आन जरिया नइ रहिस। फेर कुछ साल पहिली वो ह बकरी पालन के काम शुरू करिस अऊ कम समय म ही बकरी पालन के व्यवसाय ले अच्छा लाभ अर्जित करे लगिस, लेकिन वोखर आगू एक बड़का समस्या खड़े रहिस के जेन घर म वो बकरी पालन के काम करत हे, वो माटी के रहिस अऊ जर्जर हो गए रहिस। अइसन म बारिश अऊ ठंड म बकरी मन ल सुरक्षित रखना ऊंखर बर मुश्किल होत रहिस। बीमारी मन के चलते कई पइत बकरी मन के मृत्यु घलोक हो जात रहिस, जेखर से ओ ल बहुत जादा नुकसान उठाना परत रहिस, जतका आमदनी बकरीपालन ले होत रहिस, ओखर से ही गुजरा बसर चलत रहिस।
कांशीराम के बताती वोखर पास अभी हाल म 20 बकरी हे। एक साल के अंतराल म चार बकरी ल बेचके बीस हजार रुपया कमाइस अऊ अपन परिवार के जीवन यापन म खर्च करिस अउ चार साल के अंतराल म 40 बकरी ल बेचके दू लाख रूपिया कमाइस। ए आमदनी ले लइका मन के पढ़ाई, खेत अउ घर बनाए म खर्च करिस, फेर समस्या जस के तस बने रहिस काबर के अब घलोक बकरी मन ल रखे बर वोखर तीर कोनो पक्का घर नइ रहिस। अइसन म कांशीराम ए समस्या के समाधान बर महात्मा गांधी राष्ट्रीय ग्रामीण रोजगार गारंटी योजना (मनरेगा) के व्यक्तिगत हितग्राही मूलक काम के तहत ग्राम पंचायत म बकरी पालन शेड बर आवेदन करिस। आवेदन के मंजूरी के बाद 93 हजार 63 रुपिया के प्रशासकीय स्वीकृति मिलीस अऊ एक पक्का शेड बनवाइस। ए काम के समय कांशीराम के परिवार ल 52 दिन के रोजगार घलोक मिलिस। शेड बने के बाद कांशीराम के बकरी मन ल सुरक्षित छत मिलीस, जेखर से वोखर बकरी मन के सेहत म सुधार होइस अऊ वोखर आय म घलोक बढ़ोतरी होइस।
