गोबर खरीदी अऊ वर्मी खादे ले गौठान मन म आठ करोड़ रूपिया ले जादा के टर्न ओवर : पाछू एक साल म करीबन तीन करोड़ रूपिया के गोबर खरीदी, पांच करोड़ रूपिया ले जादा के केवल खाद बनिस

कोरबा, 13 अगस्त 2021। गोबर जइसे खईता के चीज ल दू रूपिया किलो म बिसाए के राज्य सरकार के गोधन न्याय योजना गांव वाले मन ल रोजगार अऊ कम समय म जादा फायदा देवइया साबित होवत हे। जिला के 215 गौठान मन म दू रूपिया किलो म गोबर खरीदके वर्मी कम्पोस्ट बनाके पाछू एक साल म आठ करोड़ 32 लाख रूपिया ले जादा के व्यवसाय पूरा करे कोति बढ़त हे। जिला के 200 ग्रामीण अऊ 15 शहरी गौठान मन म अभी तक 14 हजार 777 टन गोबर खरीदे गए हे। करीबन साढ़े नौ हजार गोबर विक्रेता मन ल दू रूपिया प्रति किलो के दर ले एखर बर दू करोड़ 95 लाख रूपिया के भुगतान घलोक कर दे ग ए हे। गौठान मन म स्वसहायता समूह मन के महिला मन ह बिसाए गोबर ले तीन करोड़ 87 लाख रूपिया के वर्मी-सुपर कम्पोस्ट खाद तियार करे हें। स्वसहायता समूह के महिला मन अऊ गौठान समिति के सदस्य मन ल ये खाद के बिक्री ले अभी तक तीन करोड़ 67 लाख रूपिया मिल गे हे उहें करीबन 20 लाख रूपिया के खाद बिक्री बर गौठान मन म अभी माड़े हें। गौठान मन के वर्मी टांका मन म अभी घलोक खाद बनाए बर गोबर भरे हे अऊ अवइया 15 दिन म ए टांका मन ले करीब डेढ़ करोड़ रूपिया के करीबन एक हजार 800 टन जैविक खाद मिले के उम्मीद हे।