गोधन ह बना दीस जोड़ी

गोधन ह बना दीस जोड़ी : गोबर बेचके होए कमई त बिहाव म आवत रूकावट होगे दूर
गोधन न्याय योजना के सेति मिलीस जीवनसंगिनी
राज्य सरकार के प्रति विश्वास बाढ़िस: मुख्यमंत्री दाऊ भूपेश बघेल
रइपुर, 29 जून 2022
कुछ बछर पहिली एक ठो फिलिम आए रिहिसे “रब ने बना दी जोड़ी”, इही ल छत्तीसगढ़ म अब लोगन कहे लगे हे “गोधन ने बना दी जोड़ी”। दरअसल कोरिया म एक झिन युवक के बिहाव के रुकावट गोबर बेचे ले दूर होगे अउ गोबर बेचे के कमई ल देखके ओकर बिहाव होगे। किस्सा कोरिया जिला के मनेन्द्रगढ़ के रहइया श्री श्याम जायसवाल के हरे। श्याम ह ये गोबर बेचे ले होए कमई के पीछू बिहाव तया होए के रोचक किस्सा मुख्यमंत्री दाऊ भूपेश बघेल के आगू म भेंट-मुलाकात कार्यक्रम के बेरा बताइस।
मुख्यमंत्री दाऊ भूपेश बघेल आज भेंट-मुलाकात के कड़ी म कोरिया जिला के पाराडोल पहुंचे रिहिसे। ग्रामीण मन संग चर्चा के बेरा जब बात गोधन न्याय योजना के छिड़ीस त मुख्यमंत्री ले भेंट-मुलाकात करे बर पहुंचे श्री श्याम कुमार जायसवाल गोधन न्याय योजना ले ओर जिंदगी म आए बदलाव ल लेकर रोचक किस्सा साझा करीन। श्री श्याम कुमार बताइस कि गोधन न्याय योजना के सेति ओकर बिहाव म आए रूकावट दूरिहागे अउ वोला जीवनसंगिनी मिलीस। दरअसल पशुपालन करइया श्री श्याम कुमार के आमदनी पहिली बहुते-कम रिहिसे। वोमन पहिली दूध डेयरी के बेवसाय करत रिहिसे। वोकर आमदनी निचट कम होवय। गोधन न्याय योजना लागू होए ले वो गोबर बेचना शुरू करीन। श्री श्याम कुमार अब तक दू लाख पांच हजार किलोग्राम गोबर बेच चुके हे, जेकर ले वोला चार लाख 10 हजार रुपिया के आमदनी होए हे।
शुरू होइस नवा जिनगानी
श्री श्याम कुमार ह बताइन कि गोबर बेचे ले होए आमदनी ले पहिली वो कुछ गौवंश बिसाइस, जेकर गोबर बेचके वोकर आमदनी बाढ़िस। जेकर ले वो मवेषी मन बर शेड बनवाइस। आर्थिक रूप ले सक्षम होए ले अपन भाई ल अंग्रेजी माध्यम के स्कूल म दाखिला देवाइस। ये तरह श्री श्याम कुमार कहीन, गोधन न्याय योजना ले मोर जिनगी म सकारात्मक बदलाव आइस हे, एकर बर मैं मुख्यमंत्री दाऊ भूपेश बघेल के बहुत-बहुत धन्यवाद करत हौं।
युवक के मेहनत देख परिजन होइन प्रभावित:
भेंट-मुलाकात कार्यक्रम म पति श्याम कुमार संग पहुंचे ओकर सुवारी श्रीमती अंजू बताइन कि वोह नर्सिंग स्टॉफ हे। बिहाव के चर्चा चलत रिहिसे, इही बीच परिवार वाले मन ल श्री श्याम कुमार के बारे म जानकारी मिलीस कि वो गोबर बेचके अच्छा आमदनी कमावत हावय। संगे-संग अपन बेवसाय बढ़ाए बर अबड़े मेहनत करत हावय, येकर ले वोमन प्रभावित होके मंजू के हाथ ल गोबर बेचइया के हाथ म सँऊपे बर राजी हो गइन। उन्कर बिहाव इही 19 जून के होइस हवय। राज्य सरकार के अभिनव योजना के सेति दाम्पत्य जीवन म बंधाए ये जोड़ी घेरी-बेरी मुख्यमंत्री दाऊ भूपेश बघेल अउ राज्य सरकार के आभार जतावत रिहिसे।
सरकार के प्रति विश्वास बाढ़िस हे:
राज्य सरकार के अभिनव योजना के सेति दाम्पत्य जीवन म बंधाए ये जोड़ी के कहानी सुने के पीछू मुख्यमंत्री दाऊ भूपेश बघेल ह उन मन ल बिहाव के अउ दाम्पत्य जीवन खातिर बधई अउ शुभकामना दीन। मुख्यमंत्री बघेल कहीन कि, बीते साढ़े तीन बछर म प्रदेशवासी मन म राज्य सरकार के प्रति विश्वास बाढ़िस हे। नवाजोड़ी एकर बड़का उदाहरण हरे।