गोधन न्याय योजना के वेबसाइट अऊ मोबाइल एप ल मिलीस राष्ट्रीय स्तर के पुरस्कार

रायपुर, 16 दिसम्बर 2020। छत्तीसगढ़ म कृषि विभाग कोति ले संचालित गोधन न्याय योजना बर चिप्स के बनाए वेबसाइट अऊ मोबाइल एप ल राष्ट्रीय स्तर म पुरस्कार मिले हे। देश के ख्याति प्राप्त आई.टी. संस्था एलेट्स टेक्नोमिडिया ह डिजिटल गवर्नेंस श्रेणी म गोधन न्याय योजना ल वर्चुअल समारोह म “अवार्ड आफ एक्सीलेंस” प्रदान करे हे। वर्चुअल समारोह म छत्तीसगढ़ के कृषि उत्पादन आयुक्त अऊ सचिव कृषि विभाग डॉ. एम. गीता ल सम्मानित करे गीस।
जानबा हे के मुख्यमंत्री श्री भूपेश बघेल ह हरेली परब म गोबर खरीदी बर गोधन न्याय योजना के शुरूआत करे रहिन। ये योजना म दू रूपिया प्रति किलो के दर म गौठान मन म गोबर के खरीदी करे जात हे। खरीदे गए गोबर ले वर्मी कम्पोस्ट संग दीया, गमला, अगरबत्ती जइसे उत्पाद महिला समूह मन तियार करत हें। ये योजना ले जिहां पशुपालक मन ल पशु मन बर चारा के व्यवस्था करे म सहयोग मिलत हे, उहें बड़ संख्या म महिला समूह मन ल रोजगार अऊ वर्मी कम्पोस्ट के उपयोग ले प्रदेश म जैविक खेती ल बढ़ावा मिलत हे।