छत्तीसगढ़ के गोधन न्याय योजना ल मिलीस राष्ट्रीय इनाम

मुख्यमंत्री अउ कृषि मंत्री ह प्रदेशवासी मन गोधन न्याय मिशन ले जुड़े अधिकारी-कर्मचारी मन ल दीन बधाई अऊ शुभकामना

रायपुर, छत्तीसगढ़ शासन के महत्वाकांक्षी गोधन न्याय योजना ल राष्ट्रीय स्तर म एलेट्स एनोवेशन अवार्ड (Elets Innovations Award) ले सम्मानित करे गए हे। एलेट्स आत्म निर्भर भारत समिट म छत्तीसगढ़ राज्य ल कृषि म इनोवेशन केटेगरी म ये अवार्ड प्रदान करे गीस। नई दिल्ली म आयोजित दू दिन के एलेट्स आत्म निर्भर भारत समिट म 19 अपरेल के एलेट्स टेक्नोमीडिया प्राईवेट लिमिटेड के संस्थापक, सीईओ अउ एडीटर ए चीफ श्री डॉ. रवि गुप्ता अउ टेक्सटाइल मंत्रालय भारत सरकार के सचिव श्री यू.पी. सिंह ह संघरा ये अवार्ड दीन। सचिव अउ राज्य नोडल अधिकारी छत्तीसगढ़ कोति ले ये अवार्ड संयुक्त संचालक श्री आर.एल. खरे ह झोंकिन। मुख्यमंत्री श्री भूपेश बघेल अउ कृषि मंत्री श्री रविन्द्र चौबे ह ये शानदार उपलब्धि बर प्रदेशवासी, कृषि विकास, कृषक कल्याण अऊ जैव प्रौद्योगिकी विभाग, गोधन न्याय मिशन के अधिकारी-कर्मचारी, गौठान समिति अउ स्व-सहायता समूह के महिला मन ल बधाई अऊ शुभकामना देहे हें।
जानबा हे कि छत्तीसगढ़ सरकार के गोधन न्याय योजना ल एखर से पहिली पर्यावरण संरक्षण अऊ सतत् विकास म उत्कृष्ट योगदान बर ’स्कॉच गोल्ड अवार्ड’ मिल चुके हे। स्कॉच ग्रुप ह छत्तीसगढ़ के गोधन न्याय योजना ल 20 मार्च 2021 के नई दिल्ली म ये अवार्ड प्रदान करे रहिस। मुख्यमंत्री श्री भूपेश बघेल के पहल म 20 जुलाई 2020 हरेली परब ले छत्तीसगढ़ म गोधन न्याय योजना चालू करे गए रहिस। ये योजना म पशुपालक अऊ गांव वाले मन ले 2 रूपिया प्रति किलो के दर म गोबर खरीदी करे जात हे।
मुख्यमंत्री श्री भूपेश बघेल ह प्रदेशवासी अऊ कृषि विभाग के अधिकारी मन अऊ कर्मचारी मन ल बधाई देवत कहिन हे कि छत्तीसगढ़ के गोधन न्याय योजना न सिरिफ ग्रामीण अर्थव्यवस्था ल मजबूती प्रदान करत हे, भलुक अवार्डस् के माध्यम ले ये योजना ल राष्ट्रीय स्तर म मान्यता घलोक मिलत हे।