लइका मन के पढ़ई म सहायक बनिस फोन, गोबर खरीदी के एन्ट्री घलोक करर हे फोन म
कोरबा, छत्तीसगढ़ सरकार के महत्वकांक्षी गोधन न्याय योजना के सीधा लाभ ग्रामीण किसान मन ल मिलत हे। ग्राम पंचायत अमरपुर के निवासी श्रीमती ललिता बिंझवार ह गोधन न्याय योजना के तहत् 20 हजार 936 रूपिया के गोबर बेचके स्मार्ट फोन बिसाए हे। स्मार्ट फोन ले जिहां लइका मन के आनलाईन पढ़ई म सुविधा मिले हे। उहें दुसर कोति अमरपुर गौठान म होवत गोबर ब्रिकी के आनलाईन एन्ट्री घलव इही स्मार्ट फोन ले करत हे।
पशुपालक श्रीमती ललिता बिंझवार पति नर्मदा बिंझवार तीर 10 पशु हे। ऊंखर तिर वन अधिकार पट्टाधारी कृषि जमीन घवल हे। जेमां वो मन खेती करथें। उमन योजना चालू ले लेके अब तक करीबन 105 कुंटल गोबर के बिक्री करे हें। जेखर से उमन ल करीबन 21 हजार रूपिया के लाभ मिले हे। पहिली ललिता बाई के घर म कीपेड मोबाईल रहिस। जेमां इन्टरनेट के सुविधा नइ रहिस। जेखर से ओखर लइका मन के आनलाईन पढ़ई नइ हो पात रहिस। ललिता ह गोधन न्याय योजना के तहत बेचे गए गोबर ले मिले पईसा म ले 15 हजार रूपिया के स्मार्ट फोन बिसाए हे। स्मार्ट फोन ले अब लइका मन के आनलाईन पढ़ई के सुविधा मिलत हे। एखर संगेच अमरपुर गौठान म होवईया गोबर खरीदी के आनलाईन एन्ट्री घलोक वो ह इही स्मार्ट फोन ले करत हे। ललिता बाई के कहना हे कि राज्य शासन कोति ले संचालित गोधन न्याय योजना ले हम किसान, पशुपालक मन ल सीधा आर्थिक लाभ होवत हे। ये योजना ले लाभ पाके ललिता अऊ ओखर परिवार खुश होके राज्य शासन के आभार प्रकट करत हे।
