मुख्यमंत्री ह गोधन न्याय योजना के तहत 88 हजार ले जादा हितग्राही मन के खाता म अंतरित करिन 8.56 करोड़ रूपिया के राशि

• गोधन न्याय योजना के तहत अब तक 29.28 करोड़ रूपिया के हो चुके हितग्राही मन ल भुगतान
• गौठान मन म तियार वर्मी कम्पोस्ट ‘गोधन वर्मी कम्पोस्ट‘ के नाम ले लॉन्च
• हर जिला म वर्मी कम्पोस्ट पैकेजिंग के काम महिला स्व-सहायता समूह मन ल दे जाही

रायपुर, 06 अक्‍टूबर 2020। मुख्यमंत्री श्री भूपेश बघेल ह आज अपन निवास कार्यालय ले कम्प्यूटर के बटन दबाके गोधन न्याय योजना के तहत प्रदेश के 88 हजार 810 गौपालक अऊ गोबर विक्रेता मन ल पांचवा किश्त के रूप म 8 करोड 56 लाख रूपिया के राशि के ऑनलाइन भुगतान सीधा संबंधित मन के खाता म करिन। 20 जुलाई हरेली पर्व ले चालू होए गोधन न्याय योजना के अंतर्गत अब तक गौपालक अऊ गोबर विक्रेता मन ल 29 करोड़ 28 लाख रूपिया के राशि के भुगतान करे जा चुके हे।

मुख्यमंत्री ह ये बेरा म गौठान मन म तियार करे गए वर्मी कम्पोस्ट ल ‘गोधन वर्मी कम्पोस्ट‘ के नाम ले लॉन्च करिन। मुख्यमंत्री ह कहिन के गौठान मन म तियार वर्मी कम्पोस्ट के पैकेजिंग के काम हर जिला म महिला स्व-सहायता समूह मन ल सौंपे जाय। ये महिला स्व-सहायता समूह पैकेजिंग बैग म प्रिन्टिंग के काम करहीं। उमन कहिन के वर्मी कम्पोस्ट के पैकेजिंग म ये ध्यान रखे जाय के वर्मी कम्पोस्ट के बैग खरीदी करइया बर हैण्डलिंग के दृष्टि ले सुविधा जनक होवय अऊ वर्मी कम्पोस्ट म लम्बा समय तक नमी बने रहय।