गांव अऊ गांव वाले मन के आर्थिक प्रगति के चक्र बनत हे गोधन न्याय योजना

कोरिया, 28 नवंबर 2020। कोरिया जिला के खड़गवां जनपद पंचायत के गांव सकरिया के रहइया जयंत राम ह गोधन न्याय योजना के लाभ लेवत नवा भंइस बिसा लीस त उहें इही जनपद पंचायत के गांव पेंड्री के किसान सुखराज ह दू छेरी बिसा लीस। विकासखण्ड सोनहत के ग्राम पंचायत केशगवां के रहइया इन्द्रकुंवर ह गोधन न्याय योजना के तहत प्राप्त राशि ले वेट मशीन खरीदीस, जेन ल वो अड़बड़ समय ले खरीदना चाहत रहिस। ये जरूरत अक्सर घर के बड़का जरूरत मन के सूची म खल्‍हे डहर चल देत रहिस काबर के महीना के घर खर्च हिसाब म इंकर मन बर रूपिया बांचतेच नइ रहिस। अब गोधन न्याय योजना ले हर 15 दिन म राशि मिल जात हे जेखर से घर के खर्च घलोक व्यवस्थित हे अऊ ये जरूरत घलोक पूरा होवत हे।
अइसन कई असल कहानी हे जऊन गोधन न्याय योजना के धरातल म सफलता के प्रमाण हे। ग्रामीण अर्थव्यवस्था ल मजबूत बनाए बर मुख्यमंत्री श्री भूपेश बघेल के मंशा के मुताबिक संचालित ये योजना ह कोरिया जिला म केवल पशुपालक भर मन ल ही नहीं, स्वसहायता समूह मन ल घलोक आर्थिक प्रगति के रद्दा देखाए हे। ये योजना के चक्र ही आज गांव अऊ गांव वाले मन के आर्थिक विकास के चक्र बनत हे।