मुख्यमंत्री श्री भूपेश बघेल ह गोधन न्याय योजना के हितग्राही मन ल करिन 7 करोड़ 4 लाख रूपिया के भुगतान

रायपुर, मुख्यमंत्री श्री भूपेश बघेल ह आज इहां विधानसभा स्थित अपन कार्यालय कक्ष म आयोजित कार्यक्रम म गोधन न्याय योजना के तहत पशुपालक गांव वाले मन, गौठान ले जुड़े महिला समूह मन अऊ गौठान समिति मन ल 7 करोड़ 4 लाख रूपिया के राशि के ऑनलाइन भुगतान करिन, जेमां 16 फरवरी ले 28 फरवरी तक गौठान मन म पशुपालक गांव वाले मन, किसान मन, भूमिहीन मन ले बिसाए गए 2.13 लाख क्विंटल गोबर के एवज म 4 करोड़ 25 लाख रूपिया, गौठान समिति मन ल 1.65 करोड़ रूपिया अऊ महिला समूह मन ल 1.14 करोड़ रूपिया के लाभांश राशि सामिल हे।
मुख्यमंत्री ह ये बेरा म कहिन कि हर महीना के 5 ले 15 तारीक किसान मन बर खास होथे। काबर के ये दिन ओ मन ल गोधन न्याय योजना के पईसा देहे जाथे। ये खुशी के बात हे कि बड़ संख्या म गौठान स्वावलंबी होवत हे। स्वावलंबी गौठान ल प्रोत्साहित करे बर गौठान मन के संचालन समिति के अध्यक्ष अऊ सदस्य ल मानदेय प्रदान करे के निर्णय लेहे गए हे। उमन आन गौठान मन ल घलोक स्वावलंबी होए के गिलौली करिन। श्री बघेल ह कहिन कि ये खुशी के बात हे कि अब गोबर ले आन उत्पाद के बनाए के अलावा बिजली बनाए के काम शुरू हो गए हे। बस्तर के डोमरपाल म गोबर ले बिजली बनाए के संयंत्र ल ग्रिड ले सिंक्रोनाईज करे जा चुके हे। एखर से बनइया बिजली के दर 9 रूपिया प्रति यूनिट तय कर देहे गए हे।
ये बेरा म कृषि मंत्री श्री रविन्द्र चौबे ह सम्बोधित करिन, कार्यक्रम म खाद्य मंत्री श्री अमरजीत भगत, मुख्यमंत्री सलाहकार श्री राजेश तिवारी, अपर मुख्य सचिव श्री सुब्रत साहू, कृषि उत्पादन आयुक्त डॉ. कमलप्रीत, कृषि विभाग के विशेष सचिव श्री अयाज तम्बोली, कृषि विभाग के संचालक श्रीमती रानू साहू, उद्यानिकी विभाग के संचालक श्रीमती चंदन त्रिपाठी उपस्थित रहिन।