गोधन न्याय योजना ले दूध बेवसाय ल सहारा : मुख्यमंत्री दाउ भूपेश बघेल

रइपुर, 16 जून 2021 बुधवार। मुख्यमंत्री दाउ भूपेश बघेल कहीन कि गोधन न्याय योजना ले राज्य म पशुधन के संरक्षण अउ संवर्धन के संगे—संग दूध उत्पादन बेवसाय ल एक नवा सहारा मिले हे। पशुपालक, गँवइहा अउ किसान मन ले सरलग गोठबात होते रहिथे, वोमन ये योजना के लाभ ले अबड़े उत्साहित हवय। दूध बेवसाय करइया मन बताथे कि गोधन न्याय योेजना ले गोबर बिसई होए ले उन्कर आमदनी बाढ़ गे हे । कई झिन मन गोबर बेचे ले मिले उपराहा आय ले अपन दूध बेवसाय ल बढ़ाए बर दुधारू गाय बिसाए, शेड के निर्माण कराए के संग फटफटी खरीदे के संग आने आवश्यक जरूरत मन ल पूरा करे लगे हे।
मुख्यमंत्री के बताती आज कोरिया अउ सूरजपुर जिला के किसान मन ले उन्कर वीडियो कॉन्फ्रेंसिंग के माध्यम ले चर्चा होइस। चिरमिरी म दूध बेवसाय करइया विष्णु प्रसाद ह बताइस कि वोमन 650 क्विंटल गोबर बेचके एक लाख 33 हजार रूपिया उपराहा लाभ पाइस हे, जेकर दू ठिन दुधारू गाय अउ बिसा लीस । गोधन न्याय योजना ले लाभान्वित कोरिया के श्री शिवचरण ह 48 हजार रूपिया के लाभ होए ले दू​ ठिन बइला अउ किश्ती म फटफटी बिसाए हे। विश्रामपुर के गौपालक श्रीमती गीता देवी ह गोधन न्याय योजना ल सहिरावत कहीन कि गोबर बेचे ले होवइया आमदनी ले वोह गाय मन बर छपरी बनवावत हे। येकर ले रोजमर्रा के जरूरत अउ रइपुर म मेडिकल के पढ़ई करत बेटी के फीस अउ आने खर्चा के प्रबंध तको असानी ले होए लगे हे। श्रीमती गीता देवी सिंह ह गोधन न्याय योजना ल जारी रखे के आग्रह करीन।
मुख्यमंत्री दाउ भूपेश बघेल कहीन कि गोधन न्याय योजना सिरिफ गोबर क्रय करे के योजना नोहय, एकर कई ठन फायदा हे । गउ—पालन हमार सभ्यता अउ संस्कृति हरे, वोला ये योजना ले बढ़ावा मिले लगे हे। गोबर ले वर्मी कम्पोस्ट, सुपर कम्पोस्ट के उत्पादन के संगे-सग आने समान मन के निर्माण ले हमार गँवइहा बहिनी मन ल रोजगार मिला हे,एकर ले उन मन ल उपराहा आमदनी होए लगे हे। गोबर ले जादा मात्रा म वर्मी कम्पोस्ट अउ सुपर कम्पोस्ट बने ले राज्य म जैविक खेती ल बढ़ावा मिले लगे हे। एकर ले खेती के लागत म कमी अउ भूइयां के उर्वरा शक्ति बने होगे।