- जिला म 10,547.36 कुंटल गोबर खरीदी
- पशुपालक मन ल मिलही 21लाख 09 हजार 472 रूपिया भुगतान
जांजगीर-चांपा, 17 अगस्त 2020। गोधन न्याय योजना ले जिला के पशुपालक मन ल दूध के अलावा अब गोबर ले घलोक नगदी आमदनी मिले लगे हे। जिला के 15 नगरीय निकाय अऊ 9 विकास खण्ड के ग्रामीण क्षेत्र मन के 255 गौठान मन म कुल- 4,344 पशुपालक मन ह पंजीयन करवाए हें। राज्य सरकार ह प्राथमिकता के संग पशुपालक मन ल प्रोत्साहित करे बर 02 अगस्त ले 15 अगस्त तक खरीदे गए गोबर के राशि के भुगतान पूर्व प्रधानमंत्री स्व. श्री राजीव गांधी के जन्म दिवस के अवसर म 20 अगस्त ले करे जाही।
जानबा हे के जिला के 15 नगरीय निकाय के 597 पशुपालक मन ह गोबर बेंचे बर संबंधित गौठान मे पंजीयन करवाए हें। नगरीय निकाय के गौठान मन म 02 अगस्त ले 15 अगस्त तक 1086.22 कुंटल गोबर के खरीदी करे गए हे। जेखर मुल्य 2 लाख 17 हजार 244 रूपिया के ऑनलाइन भुगतान गोबर विक्रेता मन के बैंक खाता म सीधा करे जाही। अइसनहे 09 जनपद पंचायत मन म गोबर खरीदी बर 240 गौठान मन के पंजीयन करे गए हे। जेमां ले 227 गौठान मन म गोबर के खरीदी चालू हो गए हे। गौठान मन म 02 अगस्त ले 15 अगस्त तक 9461.14 कुंवटल गोबर के खरीदी केरे गए हे। जेखर मुल्य 18 लाख, 92 हजार ,228 रूपिया के ऑनलाइन भुगतान गोबर विक्रेता मन के बैंक खाता म करे जाही।
