- जिला पंचायत सीईओ श्री सच्चिदानंद आलोक हा कृषि विभाग के अधिकारी मन ला ये दिशा म पूरा जोर लगाये ला बोलिस
- खेत के मेड़ मन म राहेर (अरहर) लगाये के काम के मानिटरिंग बर घलो बोलिस
दुर्ग, 27 जून 2020/ राज्य सरकार के गोधन योजना के माध्यम ले जैविक खेती कोति मनखे मन अब आगू बढ़हीं। संगेच एखर से पशुपाल मन ल घलव अड़बड़ आमदनी होही। एखर माध्यम ले जैविक खेती के रद्दा के संग पशुधन के पूरा इस्तेमाल घलो हो पाही। ये बात आज कृषि विभाग के अधिकारी मन के संग बैठक म जिला पंचायत सीईओ श्री सच्चिदानंद आलोक हा कहिस। एकर से जैविक खेती के माध्यम से फर्टिलाइजर म लगइया खरचा घटही। एखर संगेच आप मन जानतेच हावव के जैविक उत्पाद के अभी बड़का बाजार हे, एकर से किसान मन ला अपन उत्पाद के जादा दाम मिलही। ये बात बर कृषि विभाग के अधिकारी मन मनखे मन प्रेरित करहीं तेकर से ग्रामीण विकास के नवा रद्दा खुलही। उमन कहिन के विशेष रूप ले जैविक सब्जी के बड़का मार्केट उपलब्ध हे। कंपोस्ट खाद के माध्यम ले हमार बाड़ी मन म होवइया उत्पादन ले ग्रामीण मन के आय घलोक बाढ़ही अउ असल म एकर से जैविक खेती के दायरा बाढ़ही जे कृषि के लागत के दृष्टि ले घलो सही एप्रोच हे अउ स्वास्थ्यप्रद घलो हे।
सीईओ हा कहिस के गौठान मूलतः ग्रामीण आजीविका के प्रमुख केंद्र बनही। लोगन मन ला जैविक खाद के अच्छा दर मिलही। एखर बर शासन हा अभिवन योजना लाए हे। एखर ले पहली जिला प्रशासन हा घलो पहल करके उद्यानिकी फसल बर जैविक खाद के इस्तेमाल करे रहिस। ये प्रकार ले पहली घलो हमार स्वसहायता समूह मन के महिला मन के खाद बनेच बिकत हे। येमे कृषि अधिकारी ये देखहीं के लोगन मन वैज्ञानिक तरीका ले कंपोस्ट खाद के उत्पादन करयं। ए काम के सरलग देखभाल करे जाही जेकर से अच्छा खाद उत्पादन के संभावना बनही। सीईओ के बताती एखर बर गौठान मन म रोटेशन आधार म मानिटरिंग तय करे जाही। उमन पंचायत विभाग के अधिकारी मन ला कृषि विभाग के अधिकारी मन के संग समन्वय ले सरलग काम करे ला कहिन। सीईओ ह एहू कहिन के राहेर (अरहर) के रकबा बढ़ाना घलो महत्वपूर्ण हे। अभी मेड़ म डीएमएफ के माध्यम ले राहेर उत्पादन के विस्तार के योजना बने हे। एखर अलावा घलव हमन ल विस्तार बर दलहन के प्रयोग करे बर किसान ला प्रोत्साहित करना चाही। उमन कहिन के शासन हा ये पइत रोकाछेका के माध्यम ले पहली पशुधन ला खरीफ फसल के मौका म बाहर निकालना बंद करा दिस। एखर फायदा ग्रामीण ले सकत हें अउ तीन फसल के लक्ष्य ला हासिल कर सकत हें। कृषि अउ पंचायत विभाग के अधिकारी मन येती विशेष ध्यान देके तीन फसल के लक्ष्य बर ग्रामीण मन ला प्रोत्साहित करयं।
ये मौका मे श्री अश्वनी बंजारे उपसंचालक कृषि, श्री के.के तिवारी, वरिष्ठ कृषि विकास अधिकारी, कृषि ग्रामीण विकास अधिकारी, कृषि विस्तार अधिकारी उपस्थित रहिन।
अंजोरा, दुर्ग ले सोनू कुमार