रायपुर, 22 जनवरी 2021। मुख्यमंत्री श्री भूपेश बघेल ह आज इहां अपन निवास ले छत्तीसगढ़ के खाद्य प्रोसेसिंग उद्योग गोयल ग्रुप कोति ले बने फ्रोजन फूड प्रोडक्ट ‘‘गोल्ड‘‘ के विदेश म जवइया पहली कन्साइनमेंट ल हरी झंडी देखा के रवाना करिन।
ये बेरा म मुख्यमंत्री श्री बघेल ह कहिन के ये अड़बड़ेच खुसी के बात हे कि छत्तीसगढ़ के स्वाद अब विदेश म घलोक चिखे जाही। राज्य के बाहिर देश-विदेश म घलोक छत्तीसगढ़ के माटी के महमहई अऊ स्वाद के जादू बने सहिन छाही। उमन कहिन कि एखर शुरुआत ठीक छै महीना पहिली कोरोना संकटकाल म होए रहिस अऊ अतीक कम समय म एक नवा उत्पाद छत्तीसगढ़ ले देश के बाहिर न्यूजीलैंड भेजे जात हे, मैं एखर बर गोयल ग्रुप ऑफ कंपनी ल बधाई अउर शुभकामना देवत हंव । एखर से छत्तीसगढ़ के नाम देश अऊ विदेश म अऊ जादा रौशन होही, ये हमार बर गरब के बात हे। मुख्यमंत्री श्री बघेल ह ये बेरा म कम्पनी के चेयरमैन श्री सुरेश गोयल संग ग्रुप ले जुड़े सबो मनखे मन ल बधाई अऊ शुभकामना दीन।
गोयल समूह के मैनेजिंग डायरेक्टर श्री राजेन्द्र गोयल ह बताइस कि मुख्यमंत्री श्री बघेल के हाथ 9 जून ल छत्तीसगढ़ के पहली फ्रोजन फूड इकाई के शुभारंभ करे गए रहिस। कोरोना संकट के दौर म चालू होए ये इकाई ह हजारों मनखे मन ल रोजगार देहे गए हे, जेमां करीबन 60 प्रतिशत महिला मन हें। उमन बताइन कि बहुत जल्दी छत्तीसगढ़ के माटी के महक लेहे गोल्ड के ये फ्रोजन फूड रेंज अमेरिका, कैनेडा, मालदीव, रशिया, मॉरिशस समेत मिडिल ईस्ट के बाजार मन म घलोक अपन पहिचान बनाही। ये उत्पाद ल FSSAI, USFDA, HALAL, FSSC 20-2000, BRCGS जइसे राष्ट्रीय-अंतर्राष्ट्रीय संस्थान मन ले लायसेंस मिले के संगेच फूड ऑडिट, क्वालिटी अऊ सेफ्टी स्टैंडर्ड ल घलोक ए-ग्रेड मिले हे । ये बेरा म गोयल समूह के चेयरमैन श्री सुरेश गोयल, मैनेजिंग डायरेक्टर श्री राजेन्द्र गोयल,बजरंग एलियांज लिमिटेड के डायरेक्टर श्री अर्चित गोयल घलोक उपस्थित रहिन।
