कोण्डागांव के नोनी ह ताईवान म अंतर्राष्ट्रीय स्तर म गोल्ड मेडल जीतके रचिस इतिहास – मुख्यमंत्री श्री विष्णु देव साय ह दीन बधाई

रायपुर/ छत्तीसगढ़ के कोण्डागांव जिला के नोनी रंजीता कोरेटी ह ताइपे (ताईवान) म आयोजित एशियन कैडेट जूडो चैंपियनशिप म गोल्ड मेडल जीतके अंतर्राष्ट्रीय स्तर म भारत अऊ छत्तीसगढ़ के नाम रोशन करे हे। छत्तीसगढ़ राज्य बाल कल्याण परिषद बालगृह बालिका कोण्डागांव के रंजीता ह कई देश मन के खिलाड़ी मन ल पराजित करत ये ऐतिहासिक उपलब्धि हासिल करे हे।
मुख्यमंत्री श्री विष्णु देव साय ह ए गौरवशाली उपलब्धि म रंजीता ल हार्दिक बधाई देवत कहिन के ये न केवल कोण्डागांव जिला बल्कि पूरा छत्तीसगढ़ राज्य बर बहुत गरब के बेरा हे। उमन कहिन के रंजीता जइसे बेटी मन राज्य के उम्मीद अऊ नवा पीढ़ी बर प्रेरणा हे, जऊन ये सिद्ध करत हे के छत्तीसगढ़ के बेटी मन अब वैश्विक मंच म अपन अलग पहिचान बनावत हें।
रंजीता के ए उपलब्धि के पीछू जिला बाल संरक्षण इकाई, महिला अऊ बाल विकास विभाग अऊ बालगृह संस्था के महत्वपूर्ण भूमिका रहे हे। सतत मार्गदर्शन अऊ सहयोग ले रंजीता मानसिक अऊ शारीरिक रूप ले सरलग सशक्त होत गीस। खेल मन म विशेष रुचि अऊ कई ठन प्रतियोगिता मन म उत्कृष्ट प्रदर्शन ल देखत ओला आईटीबीपी के सहयोग ले जूडो के प्रशिक्षण देवाए गीस। रंजीता ह साल 2021 म चंडीगढ़ म आयोजित ओपन नेशनल जूडो टूर्नामेंट म 40 किलोग्राम वर्ग म शानदार प्रदर्शन करत अपन खेल यात्रा के प्रभावशाली शुरुआत करिस।
एखर बाद साल 2022 म भोपाल म आयोजित ओपन नेशनल जूडो प्रतियोगिता म रंजीता ह ब्रॉन्ज मेडल जीतिस। साल 2024 म केरल म आयोजित खेलो इंडिया नेशनल जूडो टूर्नामेंट म 52 किलोग्राम वर्ग म सिल्वर मेडल पाइस। इही साल महाराष्ट्र के नासिक म आयोजित खेलो इंडिया रीजनल जूडो प्रतियोगिता म ओ ह गोल्ड मेडल हासिल करिस। एखर संगेच त्रिशूर (केरल) म 52 किलोग्राम वर्ग म फेर स्वर्ण पदक प्राप्त करके अपन श्रेष्ठता ल दोहराइस। पुणे म आयोजित राष्ट्रीय ओपन नेशनल जूडो चैंपियनशिप म रंजीता ह असम, तेलंगाना, महाराष्ट्र अऊ दिल्ली जइसे प्रमुख राज्य मन के खिलाड़ी मन ल पराजित करत गोल्ड मेडल अपन नाम करिस। खेलो इंडिया यूथ गेम्स, पटना (बिहार) म घलोक ओ ह जूडो चैंपियनशिप म स्वर्ण पदक प्राप्त करके जिला अऊ राज्य ल गौरवान्वित करिस।
राष्ट्रीय स्तर म सरलग उपलब्धि मन के बाद रंजीता ह अंतर्राष्ट्रीय प्रतियोगिता मन म घलोक भारत के प्रतिनिधित्व करत उल्लेखनीय प्रदर्शन करिस। अपरेल 2025 म जॉर्जिया म आयोजित कैडेट यूरोपियन कप 2025 म रंजीता ह 52 किलोग्राम वर्ग म 5वाँ जगा पाइस। एखर बाद ताशकंद (उज़्बेकिस्तान) म साल 2025 म आयोजित एशियन कैडेट चैंपियनशिप म घलोक ओ अपन उत्कृष्ट प्रदर्शन जारी रखिस। अंततः 12 जुलाई ले 15 जुलाई 2025 तक ताइपे (ताईवान) म आयोजित एशियन कैडेट जूडो चैंपियनशिप म रंजीता ह स्वर्ण पदक जीतके भारत के बर अंतर्राष्ट्रीय स्तर म गोल्ड मेडल हासिल करिस।
रंजीता के ए प्रेरणादायक यात्रा ल देखत जनवरी 2023 म ओखर चयन भोपाल स्थित स्पोर्ट्स अथॉरिटी ऑफ इंडिया (SAI) म होइस, जेमां वो अभी हाल म शिक्षा के संगे-संग जूडो के उच्चस्तरीय प्रशिक्षण प्राप्त करत हे। मुख्यमंत्री श्री साय ह कहिन के ये सफलता ये देखथे के कहूं बेटी मन ल अवसर, संसाधन अऊ सही मार्गदर्शन मिलय, त ओ मन हरेक ऊँचाई ल छू सकत हें। उमन ये घलोक कहिन के राज्य सरकार बेटी मन ल सशक्त बनाए के बर हर स्तर म प्रतिबद्ध हे, अऊ रंजीता कोरेटी जइसे उदाहरण छत्तीसगढ़ के शक्ति अऊ संभावना के चिनहारी हे।