रायपुर, मुख्यमंत्री श्री भूपेश बघेल के रायपुर स्थित निवास म हर साल के जइसे ये साल घलोक गोवर्धन अऊ देवारी तिहार पारंपरिक हर्षोल्लास अऊ उत्साह के संग मनाए गीस। निवास म आयोजित देवारी तिहार अउ गोवर्धन पूजा उत्सव म मुख्यमंत्री श्री भूपेश बघेल ह अपन धर्मपत्नी श्रीमती मुक्तेश्वरी बघेल अऊ परिवार के सदस्य मन के संग गौरा-गौरी अऊ गोवर्धन पूजा करिन अऊ गौमाता ल खिचरी खवा के प्रदेश के सुख-समृद्धि अऊ खुशहाली के मंगलकामना करिन। मुख्यमंत्री ह गौवंश के प्रति कृतज्ञता के चिन्हारी के परब म गौ माता ल अपन हाथ ले खिचरी खवा के परंपरा के निर्वहन करिन।
मुख्यमंत्री श्री बघेल ह ये बेरा म देवारी, गोवर्धन पूजा, भाई दूज, मातर अउ गौठान दिवस के बधाई देवत अपन संबोधन म कहिन कि कोरोना के बाद छत्तीसगढ़ म दीपावली बड़ उठाह के संग मनाए गीस। दीपावली के कुछ दिन पहिली 17 अकटूबर के न्याय योजना के अंतर्गत करीबन 1900 करोड़ रुपिया के राशि के अंतरण किसान, पशुपालक, स्व-सहायता समूह, भूमिहीन कृषि मजदूर मन के खाता म डारे गीस। एखर संगेच कर्मचारी मन के डीए म बढ़ोतरी अऊ बिजली कर्मचारी मन ल घलोक देवारी म बोनस दे गीस। एखर से छत्तीसगढ़ म ये साल बहुत उत्साह ले दीपावली मनाए गीस।
उमन कहिन कि हमार छत्तीसगढ़ म एक दूसर के घर म दीया पहुंचाए के परंपरा रहे हे। ये परंपरा लक्ष्मी पूजा ले शुरू होथे, गौरा-गौरी पूजन, गोवर्धन पूजा तक एकर निर्वहन होथे। दीपावली, भगवान राम के अयोध्या आगमन के उत्सव के त्यौहार ये। ये त्यौहार के दूसर दिन गोवर्धन पूजा मनाए जाथे, भगवान कृष्ण जेन खुद एक क्रांतिकारी विचारक रहिन उमन न केवल अपन विचार ले बल्कि काम मन ले घलोक पूरा दुनिया ल संदेश दीन। भगवान कृष्ण ह गोवर्धन पर्वत अऊ पशुधन के पूजा ल प्राथमिकता दीन। हमर सरकार घलोक गौ-माता के सेवा करे के काम करत हे। पशुपालक मन ल घलोक एकर लाभ मिलत हे।
ये मौका म वन मंत्री श्री मोहम्मद अकबर, मुख्यमंत्री के सलाहकार श्री प्रदीप शर्मा, छत्तीसगढ़ खनिज विकास निगम के अध्यक्ष श्री गिरीश देवांगन, छत्तीसगढ़ खादी अउर ग्रामोद्योग बोर्ड के अध्यक्ष श्री राजेंद्र तिवारी, छत्तीसगढ़ नागरिक आपूर्ति निगम के अध्यक्ष श्री राम गोपाल अग्रवाल, छत्तीसगढ़ महिला आयोग के अध्यक्ष डॉ किरणमयी नायक, जिला सहकारी बैंक रायपुर अध्यक्ष श्री पंकज शर्मा, इंदिरा कला अउर संगीत विश्वविद्यालय के कुलपति श्रीमती ममता चंद्राकर, इंदिरा गांधी कृषि विश्वविद्यालय के कुलपति डॉ. गिरीश चंदेल, प्रजापिता ईश्वरीय विश्वविद्यालय के प्रमुख कमला दीदी, कृषि उत्पादन आयुक्त डॉ. कमलप्रीत सिंह, महापौर रायपुर श्री एजाज ढेबर संग दुर्ग, राजनांदगांव, धमतरी, बिलासपुर, कबीरधाम संग पूरा प्रदेश ले आए नागरिक, जनप्रतिनिधि, समाज के सदस्य मुख्यमंत्री निवास म उपस्थित रहिन।
मुख्यमंत्री निवास म गोरधन पूजा अऊ देवारी तिहार पारंपरिक हर्षोल्लास के संग मनाए गीस
