गौरेला-पेंड्रा-मरवाही : टी.बी. अऊ कुष्ठ रोग के लक्षण वाले मरीज मन के सघन खोज अभियान आज ले शुरू

गौरेला-पेंड्रा-मरवाही, राज्य शासन कोति ले जारी दिशा निर्देश के तहत टी.बी. अऊ कुष्ठ रोग के लक्षण वाले मरीज मन के सघन खोज अभियान आज ले जिला म शुरू हो गे। ये अभियान दू चरण म 21 दिसंबर तक चलही। कलेक्टर सुश्री ऋचा प्रकाश चौधरी ह आज कलेक्ट्रेट ले अभियान रथ ल हरियर झंडी देखाके रवाना करिस।
अभियान के तहत जिला म टीबी अऊ कुष्ठ रोग के उन्मूलन बर समुदाय म लक्षण वाले हरेक मरीज मन के पहिचान करके जांच अऊ उपचार करना हे। पहिली चरण म 1 ले 15 दिसंबर तक मितानिन मन अपन कार्यक्षेत्र म घर-घर घूम के टीवी अऊ कुष्ठ रोग के लक्षण के आधार म संभावित मरीज मन के पहिचान करहीं। दूसर चरण म 16 ले 21 दिसंबर तक मितानिन मन के खोजे गए टीवी अऊ कुष्ठ रोग के मरीज मन के फेर परीक्षण संबंधित क्षेत्र के एमपीडब्ल्यू अऊ एएनएम ह करहीं।
अभियान के सफलता बर मुख्य चिकित्सा अऊ स्वास्थ्य अधिकारी डॉ. प्रभात चंद्र प्रभाकर ह जिला नोडल अधिकारी, जिला कार्यक्रम प्रबंधक, खंड चिकित्सा अधिकारी, विकासखंड कार्यक्रम प्रबंधक अऊ जिला समन्वयक मितानिन के बैठक लेके अभियान के समय घर-घर जा के टीबी अऊ कुष्ठ के संभावित मरीज मन के पहिचान अऊ जांच अऊ सघनात्मक मरीज मन के उपचार के संबंध म जरूरी निर्देश देहे हें। अभियान के सफलता बर स्वास्थ्य विभाग के संगे-संग आन विभाग मन ले घलोक सहयोग के अपील करे गए हे।