- मुख्यमंत्री ह ग्राम बनचरौदा म बने आदर्श गौठान के करिस अवलोकन
- बिहान समूह के महिला मन कोति ले बनाये गए चीज मन ल मिलीस सराहना
रायपुर, मुख्यमंत्री श्री भूपेश बघेल ह कहिन हे कि गौठान, घुरूवा अऊ बारी हमार पुरखा मन के परम्परा रहे हे। हमन एला पुनर्जीवन प्रदान करे हवन। ये गाय मन के नस्ल सुधार के संगेच किसान मन अऊ समूह के महिला मन के आर्थिक स्थिति सुदृढ़ करे म महत्वपूर्ण साबित होही। मुख्यमंत्री श्री भूपेश बघेल आज इहां रायपुर जिला के आरंग विकासखण्ड के ग्राम पंचायत बनचरौदा म सुराजी गांव योजना के तहत बने आदर्श गौठान के अवलोकन करत रहिन। ग्राम बनचरौदा म 4 एकड़ म गौठान, 8 एकड़ म चारागाह अऊ 3 एकड़ म बाड़ी बनाये गए हे। मुख्यमंत्री ह गौठान म नीम के पौधा घलोक रोपिन। उमन इहां उपस्थित बिहान महिला समूह ले चर्चा करके ऊंखर कोति ले निर्मित जैविक कीटनाशक, दवाइ अऊ आन खाद्य चीज मन के अवलोकन करिन अऊ उंखर सरहना घलोक करिन। मुख्यमंत्री श्री बघेल के बनचरौदा पहुंचे म गांव वाले मन ह खुमरी पहिनाके उंखर आत्मीय स्वागत करिन।
श्री बघेल ह उपस्थित गांव वाले मन ल सम्बोधित करत कहिन कि गाय मन ल पाले म सबले बड़े समस्या ऊंखर चारा अऊ पानी के रहिथे। गांव मन म गौठान बने ले न केवल ऊंखर चारा अऊ पानी के व्यवस्था हल हो गए हे बल्कि ये एक डे केयर सेंटर के रूप म हवय। पहिली किसान मन ल मवेशि मन ले फसल बचाय बर गांव के सबो खेत मन के फेसिंग करना परत रहिस फेर अब गौठान बन जाय ले ओ मन ल ये मां पइसा खरचा नइ करना परही अऊ अब आसानी ले ओ मन दू फसल ले सकहीं।
मुख्यमंत्री ह कहिन कि गोबर ले अभी मनखे सिरिफ छेना बनाथें फेर गौठान मन म निकलइया गोबर ले गोबर गैस, वर्मी खाद, कम्पोस्ट खाद बनाके आर्थिक उपार्जन करे जा सकही। एखर अलावा समूह के महिला मन एखर से जैविक खाद, धूप, उपटन संग गौमूत्र ले कई ठन कीट प्रबंधन दवइ बनाके बनेच आमदनी पा सकहीं। गौठान मन म देशी गाय मन के नस्ल सुधार ले किसान मन ल जादा दूध मिलही उन्हें एखर से उंखर आय घलोक बाढ़ही। जैविक खाद के बने ले जिहां कृषि के लागत कम होही उन्हें रासायनिक खाद ले होवइया नुकसान ले बांचे जा सकही।
ये बेरा म अभनपुर के विधायक श्री धनेन्द्र साहू, रायपुर जिला पंचायत के अध्यक्ष श्रीमती शारदा देवी वर्मा, मुख्यमंत्री के सलाहकार श्री प्रदीप शर्मा, जिला पंचायत सदस्य श्री द्वारिका साहू व श्री पप्पू बंजारे, कलेक्टर डॉ. एस. भारतीदासन, वरिष्ठ पुलिस अधीक्षक श्री आरिफ शेख अऊ जिला पंचायत के मुख्य कार्यपालन अधिकारी डॉ. गौरव कुमार सिंह संग बड़ संख्या म ग्रामीणजन अऊ समूह के महिला मन उपस्थित रहिन।
