आजीविका केन्द्र के रूप म विकासित होवत हे गौठान

रायपुर, 21 दिसम्बर 2020। राज्य सरकार ह अपन महत्वकांक्षी योजना नरवा, गरवा, घुरवा अऊ बाड़ी के तहत गौठान चालू करे हे। सुव्यवस्थित संचालन बर गौठान समिति मन ल जिम्मेदारी देहे गए हे। अब गौठान आजीविका केंद्र के रूप म विकसित करे जात हे। स्थानीय स्व सहायता समूह ल रोजगार मिले ले ओ मन आर्थिक बढ़ोतरी कोति आगू बढ़त हें। स्थानीय महिला स्व-सहायता समूह के महिला मन ह घलोक गौठान ले जुड़के आर्थिक समृद्धि कोति कदम बढ़ाए हें। अइसनहे एक गौठान जांजगीर-चांपा जिला के बलौदा ब्लॉक के औराईकला गौठान म गांव के ही चार स्व-सहायता समूह मन ल काम मिलत हे। अब ओ मन ल काम बर बाहिर जाय के जरूरत नइ हे। गौठान ले जुड़े समूह मन ल मिनी राईस मिल, मशरूम उत्पादन, सब्जी-भाजी अऊ जैविक खाद के माध्यम ले रोजगार के अवसर मिलत हे।