गांव वाले मन के उद्यम अऊ आजीविका के नवा ठौर बन गे हे गौठान

रायपुर, 13 फरवरी 2021। छत्तीसगढ़ राज्य के ग्रामीण अंचल म गौठान गांव वाले मन के उद्यम अऊ अजीविका के नवा ठौर बन गे हे। गौठान मन म दिनभर पशुधन के संगें-संग गांव वाले मन के चहल-पहल ग्रामीण अंचल म एक नवा बदलाव के आभास कराथे। गौठान सही म गांव वाले मन बर सुखद अऊ खुशहाल जीवन के आधार बनत जात हे, इहां संचालित कई प्रकार के आयमूलक गतिविधि मन ह ऊंखर जीवन ल गतिमान बना देहे हे। भिनसरहा पंगपगावत बेरा ले लेके अंधियार होत तक गांव वाले मन विशेषकर स्व-सहायता समूह के महिला मन इहां कई प्रकार के गतिविधि मन के संग अपन आर्थिक स्थिति ल बेहतर बनाए अऊ आत्मनिर्भरता हासिल करे बर जुटे रहिथें। ये सब संभव हो सके हे मुख्यमंत्री श्री भूपेश बघेल के महत्वाकांक्षी सुराजी गांव योजना ले। ये योजना के संग प्राकृतिक अऊ परंपरागत संसाधन मन ल सहेजे अऊ ओ मन ल संवर्धित करे के प्रयास ह ग्रामीण अंचल के अर्थव्यवस्था ल एक नवा जीवन देहे हे। सुराजी गांव योजना के चारों घटक नरवा, गरवा, घुरुवा, बाड़ी के संरक्षण अऊ विकास के स्पष्ट लाभ अब दिखे लगे हे।