रायपुर, मुख्यमंत्री श्री भूपेश बघेल ह अपन निवास कार्यालय में आयोजित कार्यक्र म कहिन के गोवा मुक्ति संग्राम म हमार पुरखा मन के घलोक महत्वपूर्ण योगदान रहे हे। देश के आजादी के लड़ाई म छत्तीसगढ़ के मनखे मन ह जऊन योगदान देहे हें, वइसनहे गोवा के मुक्ति संग्राम म घलोक छत्तीसगढ़ के योद्धा मन ह महत्वपूर्ण योगदान देहे हें। श्री बघेल ह आज इहां अपन निवास कार्यालय म स्वतंत्रता के 75वां वर्षगांठ के अंतर्गत पूरा देश म मनाए जात आजादी के अमृत महोत्सव के तहत आयोजित कार्यक्रम म गोवा मुक्ति संग्राम म सामिल होए छत्तीसगढ़ के सत्याग्रही मन के त्याग अऊ बलिदान ल सुरता करत ओ मन ल नमन करिन। उमन संस्कृति विभाग कोति ले आयोजित ये समारोह म छत्तीसगढ़ के सत्याग्रही मन के परिवारजन ल सम्मानित घलोक करिन।
श्री बघेल ह आगू कहिन कि गोवा ले पुर्तगाली मन ल खदेड़े बर वीर शिवाजी अऊ सम्भाजी ह प्रयास करिस आगू चलके गोवा ल मुक्त कराए बर डॉ.राम मनोहर लोहिया अऊ श्री मधु लिमिये संग हमार बहुत अकन नेता मन ह घलोक प्रयास करिन। छत्तीसगढ़ के पुरखा घलोक गोवा मुक्ति बर देश के मनखे मन के संग अपन भागीदारी दीन। करीबन 150 सत्याग्रही मन के दल गोवा गीस। ये दल म ठाकुर हरिनारायण सिंह, श्री नंद कुमार पाठक, श्री मोजेस मूलचंद, श्री शरद कुमार रायजादा, श्री बालाराम जोशी, श्री हरि प्रसाद शर्मा, श्री गांधी राम साहू अग्रिम पंक्ति के नेता रहिन। आगू चलके सत्याग्रही मन के संख्या 530 पहुंच गीस। गोवा म सत्याग्रही मन ह पुर्तगाली मन के बहुत प्रकार के अत्याचार अऊ यातना सहिन, गिरफ्तारी घलोक दीन। आखरी म पुर्तगाली मन के 450 साल के शासन के समाप्ति होइस।
मुख्यमंत्री ह गोवा मुक्ति संग्राम म भाग लेवइया छत्तीसगढ़ के सत्याग्रही मन मे ले अइसन सत्याग्रही जेन ल केन्द्रीय सम्मान निधि नइ मिलत हे, ओ मन ल सम्मान निधि देवाए अऊ जमीन आबंटन करे के मांग के परीक्षण कराके जरूरी पहल करे बर आश्वस्त करिन।
मुख्यमंत्री ह कहिन कि छत्तीसगढ़ सरकार के तीन साल आज पूरा होवत हे। अइसन मौका म गोवा मुक्ति संग्राम के सत्याग्रही मन के परिवारजन ल सम्मानित करे के सौभाग्य मिलत हे। उमन कार्यक्रम म गोवा मुक्ति संग्राम के सत्याग्रही स्वर्गीय ठाकुर हरिनारायण सिंह के पुत्र श्री आशीष सिंह ठाकुर अऊ पौत्र उपमन्यु सिंह, स्वर्गीय श्री नंद कुमार पाठक के पुत्र श्री संजय पाठक अऊ पुत्रवधु श्रीमती संध्या पाठक, स्वर्गीय श्री मोजेस मूलचंद के पुत्र श्री मुकेश मोजेस अऊ पुत्रवधु श्रीमती एलिजा शैलेष मोजेस, स्वर्गीय श्री शरद कुमार रायजादा के पुत्र श्री शिवेन्द्र रायजादा अऊ पुत्रवधु श्रीमती निशा रायजादा, स्वर्गीय श्री बालाराम जोशी के पुत्र श्री घनश्याम जोशी अऊ पौत्र श्री हर्ष जोशी अऊ स्वर्गीय श्री गांधी राम साहू के पुत्र श्री सुभाष चंद साहू अऊ पुत्र श्री आलहा राम साहू ल शाल, श्रीफल अऊ स्मृति चिन्ह भेंट करके सम्मानित करिन।
गोवा मुक्ति संग्राम म हमार पुरखा मन के घलोक रहे हे महत्वपूर्ण योगदान : श्री भूपेश बघेल
