मुख्यमंत्री निवास म गोवर्धन तिहार के धूम: मुख्यमंत्री श्री भूपेश बघेल ह करिस तुलसी, गौरा-गौरी अऊ गोवर्धन पूजा

रायपुर, मुख्यमंत्री श्री भूपेश बघेल ह आज कहिन कि राष्ट्रपिता महात्मा गांधी के स्वावलंबी गांव के परिकल्पना ल साकार करे बर छत्तीसगढ़ ल हरित क्रांति के संगे-संग श्वेत क्रांति के दिशा म आगू बढ़ना होही । उमन कहिन कि राज्य सरकार कोति ले कृषि ल बढ़ावा देहे बर बहुत अकन योजना संचालित करे जात हे। समर्थन मूल्य म धान खरीदी, किसान मन के करजा माफी अऊ राजीव गांधी किसान न्याय योजना ले मनखे मन के खेती – किसानी कोति रुझान बाढ़े हे। गांव -गांव म गौठान मन के निर्माण अऊ गोधन न्याय योजना के सफल क्रियान्वयन ले छत्तीसगढ़ म बरसात के फसल सुरक्षित हो गए हे। अब हमला दुसर फसल उतेरा अऊ उन्हारी ल घलोक सुरक्षित करना होही। एखर खातिर जरूरी हे कि गांव के राउत फागुन-तेरस तक गाय चराए अऊ रोका छेका ल प्रभावी ढंग ले लागू करे बर आप सब मन काम करव। मुख्यमंत्री आज अपन निवास म गोवर्धन पूजा के अवसर म आयोजित कार्यक्रम ल संबोधित करत रहिन। मुख्यमंत्री ह कहिन कि गोवर्धन पूजा के माध्यम ले भगवान श्री कृष्ण ह हमला संगठित रहे अऊ प्रकृति के पूजा के संदेश देहे हे। कहूं हम एकजुट रइबो, त बड़े ले बड़े संकट ले पार पा सकत हन।
मुख्यमंत्री ह आगू कहिन कि खेती -किसानी ल बढ़ावा देहे के राज्य सरकार के योजना मन ले प्रदेश म किसान मन के संख्या अऊ खेती के रकबा बाढ़े हे। समर्थन मूल्य म धान बिक्री बर रजिस्ट्रेशन करवया किसान मन के संख्या 15 लाख ले बाढ़के 22 लाख हो गए हे। असनहे खेती के रकबा 22 लाख हेक्टेयर ले बाढ़के करीबन 28 लाख हेक्टेयर हो गए हे। उमन कहिन कि गोधन न्याय योजना ले पशुपालक मन ल बड़का सहारा मिले हे। गोवर्धन पूजा ल हम आज राज्य म गौठान दिवस के रूप म मनावत हन । छत्तीसगढ़ देश के पहिली राज्य हे, जेन गांव वाले मन अऊ पशुपालक मन ले दू रुपिया किलो म गोबर खरीदत हे। राज्य सरकार के ये योजना ह पशु पालक अऊ गोबर सकेलईया मन ले अब तक 55 लाख कुंटल गोबर के खरीदी करे हे अऊ दू रुपए किलो के दर ले पशुपालक मन के खाता म करीबन 110 करोड रुपिया के राशि के भुगतान करे हे। उमन कहिन कि ये योजना ले डेयरी उद्योग ल बढ़ावा मिले लगे हे। गौठान मन म गोबर के खरीदी ले वर्मी कंपोस्ट अउ आन उत्पाद तियार करे के संगे-संग कई ठन आय मूलक गतिविधि मन ले हमर महिला समूह के बहिनी मन ह 80 -90 करोड़ के आय अर्जित करे हें। वर्मी खाद के उपयोग ले फसल के स्थिति बढि़या हो गए हे । हम जैविक खेती कोति बढ़त हन। उमन कहिन कि उत्तर प्रदेश अऊ मध्य प्रदेश म रासायनिक खाद ल लेके मारामारी मचे हे। किसान हलाकान अऊ परेशान हे। सोसायटी मन म रासायनिक खाद नइ मिले ले उहाँ लड़ई होवत हे। हमार राज्य म रासायनिक खाद के कमी ल हमन वर्मी कम्पोस्ट के उपयोग करके पूरा करे हन। उमन कहिन कि कहूं हम वर्मी कंपोस्ट के जादा ले जादा उत्पादन अऊ उपयोग करे लगेन, त राज्य के किसान भाइ मन ल रासायनिक खाद के जरूरतेच नइ परय।
मुख्यमंत्री ह आगू कहिन कि प्रदेश म रोजेच ढाई लाख लीटर दूध के जरूरत हे, जब कि उत्पादन कम हे। डेयरी उद्योग ल बढ़ावा देके ये कमी ल पूरा करे बर श्वेत क्रांति के जरूरत हे। उमन ये घलोक कहिन कि राज्य म दूध के उत्पादन बढ़ाके हम आंगनबाड़ी अउ प्राथमिक अऊ माध्यमिक शाला मन के लइका मन ल दूध उपलब्‍ध कराके कुपोषण ल दूर करे म सफल हो सकबो । श्वेत क्रांति ले स्वस्थ छत्तीसगढ़ के सपना ल पूरा करे जा सकत हे।
मुख्यमंत्री ह प्रदेशवासी मन ल दीपावली, गोवर्धन पूजा, गौर-गौरी पूजा, भाई दूज के शुभकामना देवत कहिन कि पूरा देश म देवारी के तिहार के शुरुआत हो गए हे, फेर हमार छत्तीसगढ़ म 28 अकटूबर ले तिहार के आयोजन के शुरुआत हो गए रहिस । हमन राष्ट्रीय आदिवासी नृत्य महोत्सव के आयोजन करेन। ओखर बाद लौह पुरुष सरदार वल्लभभाई पटेल के जयंती अऊ पूर्व प्रधानमंत्री भारत रत्न श्रीमती इंदिरा गांधी के पुण्यतिथि के आयोजन के संगेच राज्योत्सव के रंगारंग अऊ भव्य आयोजन करेन। अब देवारी तिहार मनावत हन।
ये बेरा म गृह मंत्री श्री ताम्रध्वज साहू, वनमंत्री श्री मोहम्मद अकबर, स्कूल शिक्षा अउ आदिमजाति विकास मंत्री डॉ प्रेमसाय सिंह टेकाम, संसदीय सचिव श्री विकास उपाध्याय अऊ श्री विनोद सेवनलाल चंद्राकर, विधायक श्री मोहन मरकाम, श्री सत्यनारायण शर्मा, छत्तीसगढ़ गृह निर्माण मंडल के अध्यक्ष श्री कुलदीप जुनेजा, छत्तीसगढ़ खनिज विकास निगम के अध्यक्ष श्री गिरीश देवांगन, छत्तीसगढ़ अल्पसंख्यक आयोग के अध्यक्ष श्री महेन्द्र छाबड़ा, महापौर रायपुर श्री एजाज ढेबर, सभापति श्री प्रमोद दुबे, छत्तीसगढ़ खादी अउर ग्रामोद्योग बोर्ड के अध्यक्ष श्री राजेंद्र तिवारी, राज्य महिला आयोग के अध्यक्ष श्रीमती किरणमयी नायक संग बहुत अकन जनप्रतिनिधि अऊ बड़ी संख्या म मनखे उपस्थित रहिन।