- मुख्यमंत्री ह गोरधन के पूजा-अर्चना करके प्रदेशवासी मन के खुशहाली, सुख अऊ सृमद्धि के कामना करिन
- मुख्यमंत्री म कहिन कि आज के दिन जइसे साल के 365 दिन गाय मन बर छइंहा, पानी अऊ चारा के करव व्यवस्था
- गोवर्धन तिहार- गौठान दिवस म मुख्यमंत्री निवास म राउत नाचा के धूम
रायपुर, मुख्यमंत्री श्री भूपेश बघेल के रायपुर स्थित निवास म आज गोरधन तिहार अऊ गौठान दिवस धूमधाम के संग उत्साह पूर्वक मनाए गीस, जेमां पूरा प्रदेश ले बड़ संख्या म आए मनखे सामिल होइन। मुख्यमंत्री निवास म पहली पइत मनाए गए गोवर्धन तिहार अऊ गौठान दिवस म राउत नाचा दल मन ह आकर्षक धुन के संग परंपरागत राउत नाच प्रस्तुत करके दर्शक मन ल मंत्रमुग्ध कर दीन। अखाड़ा दल ह बहुत अकन हैरतअंगेज करतब के प्रदर्शन करिन।
मुख्यमंत्री श्री बघेल ह पारंपरिक वेशभूषा म धर्मपत्नी श्रीमती मुक्तेश्वरी बघेल के संग गोरधन के पूजा अर्चना करिन अऊ प्रदेश के सुख-समृद्धि के कामना करिन। पूजा स्थल ल गांव मन के घर म गाय के सार के रूप म सजाए गए रहिस। सार के छत म छींद के पाना ले छइंहा करे गए रहिस अऊ सार ल गोबर ले लीप के सुंदर रंगोली बनाए गए रहिस। मुख्यमंत्री ह इहां सार म गाय मन ल खिचरी खवाइन। ये बेरा म छत्तीसगढ़ी संस्कृति के मुताबिक राउत अऊ केवट समाज संग आन समाज के प्रतिनिधि मन ह देवारी अऊ गोरधन पूजा के रस्म अदा करिन।
मुख्यमंत्री ह मनखे मन ल देवारी अऊ गोरधन पूजा के बधाई अऊ शुभकामना देवत कहिन कि गोवर्धन पूजा के दिन गाय मन ल खिचरी खवाए के परंपरा के मुताबिक ही हम सबो ल साल के 365 दिन गाय मन बर छइंहा, चारा अऊ पानी के व्यवस्था सुनिश्चित करना होही। राज्य सरकार ह सुराजी गांव योजना के तहत ये साल प्रदेश म 1800 गौठान बनाये हे, सबो के सहयोग ले ये साल एखर ले दुगुना गौठान बनाना हे ताकि सड़क दुर्घटना मन ल रोके के संगेच फसल मन के रक्षा हो सकय। पशुपालन ल अर्थव्यवस्था ले जोड़े, मनखे मन ल रोजगार देवाए अऊ जैविक खेती ल बढ़वा देहे के उदीम करे जात हे। ये मा सबो के सहभागिता जरूरी हे।
ये बेरा म स्कूल शिक्षा मंत्री डॉ. प्रेमसाय सिंह टेकाम, उद्योग मंत्री श्री कवासी लखमा, सांसद श्रीमती छाया वर्मा, विधायक श्री सत्यनारायण शर्मा, कुलदीप जुनेजा, विकास उपाध्याय, महापौर श्री प्रमोद दुबे, पूर्व महापौर श्रीमती किरणमयी नायक संग बड़ संख्या म गणमान्य नागरिक उपस्थित रहिन।
