पीएम सुरुज घर योजना ले बिजली बिल होइस लगभग शून्य

रायगढ़, छत्तीसगढ़ राज्य म शासन प्रशासन के संघरा उदीम मन ले प्रधानमंत्री सुरुज घर मुफ्त बिजली योजना के लाभ जन-जन तक पहुँचत हे। ए योजना ले प्रेरित होके रायगढ़ जिला के रियापारा के रहवइया श्री रविंद्र नाथ गोपाल ह अपन घर के छत म सोलर सिसटम स्थापित करे हे। पहिली ओ ल हर महीना लगभग 3,000 रूपिया तक बिजली बिल देना परत रहिस, फेर अब ओखर बिजली खरचा लगभग खतम हो गए हे।
श्री गोपाल बताथे के सोलर सिसटम लगाना वोखर जीवन के सबले बढि़या निर्णय रहिस। अब ओ ल बिजली बिल के चिंता नइ रहय अऊ ओ आत्मनिर्भरता के अनुभव करत हे। वो ह कहिस के सूरज के अुजोर ले अपन बिजली बनाना गरब के अनुभूति कराथे। ए योजना के अंतर्गत 3 किलोवाट क्षमता के सोलर प्लांट म केंद्र अऊ राज्य सरकार कोति ले 1 लाख 8 हजार रूपिया के सब्सिडी देहे जात हे अऊ बांचे राशि म बैंक 6 प्रतिशत ब्याज दर ले करजा उपलब्ध करावत हे।