बेमेतरा, शासकीय कुमारी देवी चौबे कृषि महाविद्यालय अऊ अनुसंधान केन्द्र, साजा म ग्रामीण कृषि काम अनुभव के तहत विकासखंड साजा के अंतर्गत तीन स्व सहायता समूह ल एलोवेरा ले हर्बल साबुन बनाए के प्रशिक्षण कृषि महाविद्यालय कोति ले अऊ छात्र मन के सहभागिता के संग दे गीस। ये कार्यक्रम म आंगनबाड़ी कार्यकर्ता श्रीमती छाया शिंदे के आग्रह म महुआ स्व-सहायता समूह के अध्यक्ष श्रीमती माया साहू के संग साजा विकासखंड म कार्यरत आन स्वसहायता समूह जइसे- राधेकृष्णा, कल्पना सम्मिलित होइन।
महाविद्यालय के चउंथईया साल के छात्र मन ह मौहाभाठा गांव ल ये साल गोद ग्राम के रूप चयन करे हे। ये प्रशिक्षण विश्वविद्यालय के उत्कृष्ट केन्द्र (एन.टी.एफ.पी. अऊ एम.ए.पी.) के इंजी. अभिमन्यु कालने कोति ले देहे गीस। कार्यक्रम म कृषि महाविद्यालय के अधिष्ठाता डॉ. ए. के तिवारी, मुख्य अतिथि अऊ श्री हेमन्त साहू अध्यक्ष सहकारी समिति विशिष्ट अतिथि के रूप म उपस्थित रहिन। कार्यक्रम के संचालन महाविद्यालय के डॉ. ए. के श्रीवास्तव अऊ रावे प्रभारी के दिशा-निर्देश म संपन्न करे गीस। छात्र- छात्रा मन कोति ले बताए गीस कि एलोवेरा साबुन त्वचा बर लाभ दायक हे। एलोवेरा त्वचा बर मॉइश्चराइजर के जइसे काम करथे। त्वचा ले संबंधित बीमारी, कील मुंहासा आदि ल दूर करे म घलोक मद्दगार हे। ये साबुन हर्बल पदार्थ ले बने होए के सेती त्वचा ल कोनो प्रकार के नुकसान नइ होवय।
