रायपुर GG Digital News Desk, किसान भाई मन बर एक ठन बहुत जरूरी खबर हे। कहूं आप मन रबी फसल (गेंहू, चना, सरसों) बोए हव या बोंवइया हव, त देरी झन करव। छत्तीसगढ़ सरकार ह ‘प्रधानमंत्री फसल बीमा योजना’ के पोर्टल ला चालू कर देहे हे। बीमा कराए के आखिरी तारीख 31 दिसम्बर 2025 हे।
काबर जरूरी हे बीमा?
खेती-किसानी मा कब मौसम बिगड़ जाही, कब पानी गिर जाही या ओला (करा) पर जाही, एकर कोनो ठिकाना नइ राहय। कहूं सूखा, बाढ़, कीड़ा-मकोड़ा या ओलावृष्टि ले फसल खराब होथे, त बीमा ही किसान के सुरक्षा कवच बनथे। आप ला बता देवन के पउर साल रबी सीजन मा नुकसान होय ले जिला के करीब 28 हजार किसान मन ला 48 करोड़ रुपिया ले जादा के मुआवजा मिले रिहिस।
कतका लगही प्रीमियम (प्रति हेक्टेयर)?
सरकार ह अलग-अलग फसल बर प्रीमियम दर तय करे हे, जेन बहुत कम हे:
गेंहू (सिंचित): 690 रुपिया
गेंहू (असिंचित): 405 रुपिया
चना: 645 रुपिया
सरसों: 375 रुपिया
अलसी: 315 रुपिया
कहाँ होही बीमा?
आप मन अपन पास के बैंक, सोसाइटी, चॉइस सेंटर (CSC) या घर बइठे ऑनलाइन घलो बीमा करा सकत हव। चाहे तुमन बैंक ले लोन लेहे हव या नइ लेहे हव, या फेर अधिया-रेगहा (बटाईदार) मा खेती करत हव, सबो किसान एखर फायदा उठा सकत हें।
प्रशासन के अपील हे के आपदा बता के नइ आवय, तेखर सेती 31 तारीख के रद्दा झन देखव, तुरंत जा के अपन फसल के बीमा करा लेवव।
