बिलासपुर GG Digital News Desk, छत्तीसगढ़ राज बने 25 साल (रजत जयंती) हो गे हे, अउ ये बीच बिलासपुर जिला के किसान मन के तकदीर बदल गे हे। सरकार के योजना अउ आधुनिक तकनीक ह अब खेती-किसानी ल घाटा के सौदा न ही, बल्कि कमाई के जरिया बनावत हे।
किसान सम्मान निधि ले मिलिस सहारा
खेती बर पैसा के कमी झन होवय, एकर बर ‘प्रधानमंत्री किसान सम्मान निधि’ वरदान साबित होय हे। आँकड़ा बतावत हे के बछर 2019 मा जिहाँ सिरिफ 99 हजार किसान ए योजना ले जुडे रिहिन, उहें अब 2025 मा ये आंकड़ा बढ़ के डेढ़ लाख (1।55 लाख) ले जादा हो गे हे। किसान मन ला सीधा बैंक खाता मा पैसा मिलत हे, जेखर से वोमन खाद-बीज समय मा ले पावत हें।
खेती मा अब ‘ड्रोन’ वाली दीदी
सबले बड़का बदलाव ये आए हे के अब महिला किसान मन घलो हाई-टेक हो गे हें। महिला मन ला ‘ड्रोन’ उड़ाए के ट्रेनिंग देहे जात हे, जेखर ले वोमन खेत मा आसानी ले दवाई छिंच सकत हें। एखर ले समय घलो बचत हे अउ पैदावार घलो बाढ़त हे।
बीमा अउ सिंचाई मा बंपर उछाल
अब किसान मन ला कुदरती मार के डर कम हे, काबर के फसल बीमा योजना मा लोगन के भरोसा बाढ़े हे। खरीफ अउ रबी, दुनो फसल मा बीमा करवइया मन के संख्या मा भारी बढ़ोतरी होय हे। उहें नहर, नलकूप अउ तालाब ले सिंचाई के रकबा 27% ले 47% तक बाढ़ गे हे। ‘पीएम आशा योजना’ के चलत दलहन-तिलहन के खेती मा घलो किसान मन के रुझान बाढ़े हे।
कुल मिलाके, बिलासपुर के किसान अब आधुनिक खेती कोति आगू बढ़त हें अउ रजत जयंती वर्ष मा खुशहाल होवत हें।