बलरामपुर, शासन के महत्वाकांक्षी ‘चिरायु योजना’ एक पइत फेर जरूरतमंद लइका मन बर संजीवनी साबित होए हे। बलरामपुर जिला के ग्राम महाराजगंज के रहइया छोट कन नोनी सुरेखा ल गंभीर हृदय रोग ले जूझे के बाद अब नवा जीवन मिले हे। स्वास्थ्य शिविर म विशेषज्ञ चिकित्सक मन ह सुरेखा के पूरा स्वस्थ होए के पुस्टि करे हें।
सुरेखा के हृदय म जन्म ले ही छेद रहिस, जेकर पहिचान स्कूल म आयोजित स्वास्थ्य परीक्षण शिविर के समय होए रहिस। ए जानकारी ले सुरेखा के माता-पिता बिकट चिंतित हो गीन, फेर चिरायु योजना ह ऊंखर बर उम्मीद के किरण दिखाईस। योजना के तहत सुरेखा ल श्री सत्य साईं अस्पताल रायपुर म भेजे गीस, जिहां ओखर निःशुल्क सफल ऑपरेशन करे गीस। ए बेरा म जम्मो जांच, सर्जरी, दवइ अऊ देखभाल के खरचा योजना कोति ले ही फोकट म होइस।
सुरेखा के पिता कुन्दलेश ह भावुक होके बताइस के आर्थिक स्थिति कमजोर होए के सेती ओ ह बेटी के इलाज बड़का शहर म नइ करवा सकत रहिस। फेर जिला प्रशासन अऊ स्वास्थ्य विभाग के सहायता ले न केवल सुरेखा के इलाज संभव होइस, बल्कि अब वो पूरा स्वस्थ होके सामान्य लइका मन के जइसे खेलकूद सकत हे।
वो ह कहिस – “चिरायु योजना ह न सिरिफ मोर बेटी के जान बचाए हे, बल्कि ओखर बचपन घलोक लहुटा दीस। ये हम जइसे आम मनखे मन बर कोनो वरदान ले कम नइ हे। मैं मुख्यमंत्री श्री विष्णु देव साय , स्वास्थ्य मंत्री श्री श्याम बिहारी जायसवाल,जिला प्रशासन अऊ चिकित्सा टीम के आभार व्यक्त करत हंव।”
जानबा हे के चिरायु योजना के अंतर्गत प्रदेशभर म अब तक हजारों लइका मन ल गंभीर बीमारी मन ले राहत देवाए जात हे। सरकार के ये पहल लइका मन के स्वास्थ्य अऊ उज्ज्वल भविष्य के दिशा म एक सार्थक कदम हे।
चिरायु योजना ले सुरेखा ल मिलीस नवा जीवन: गंभीर हृदय रोग ले उबरिस बालिका, खांटी जानकार ह करिस पूर्ण स्वस्थ होए के पुस्टि
