किसान परिवार ल मिलीस किडनी के गंभीर बीमारी के इलाज म शासन ले मदद, मिलीस नवा जीवन
बिलासपुर, मंगला के किसान मुजफ्फर खान के किडनी के इलाज बर मुख्यमंत्री विशेष स्वास्थ्य सहायता योजना के तहत पइसा पास हो गीस, जेखर से वोखर इलाज म आसानी होवत हे। परिवार ह मुख्यमंत्री श्री विष्णु देव साय के संवेदनशील पहल बर आभार जताए हे। मुख्यमंत्री विशेष सहायता योजना के तहत ए साल बिलासपुर जिला के 131 परिवार ये योजना ले लाभान्वित होए हें। योजना के तहत गंभीर रोग मन के इलाज बर 25 लाख तक के आर्थिक सहायता देहे जाथे।
मंगला निवासी किसान मुजफ्फर खान पाछू 2 साल ले किडनी के गंभीर बीमारी ले पीड़ित हे, इलाज म लाखों के खरचा रहिस, खेती किसानी करइया परिवार अपन तिर जतका जमा पूंजी रहिस तेकर ले प्रदेश के एक बड़े निजी अस्पताल म ओखर इलाज शुरू कराइस, फेर हर तीसरइया दिन होवइया डायलिसिस के खरचा ह उंखर कमर तोड़ दीस। मुजफ्फर खान के बेटा मुश्ताक खान ह बताइस के ए बेरा म ओ मन ल ‘मुख्यमंत्री विशेष स्वास्थ्य सहायता योजना‘ के विसय म जानकारी मिलीस अऊ रायपुर जाके वो ह एखर बर आवेदन करिस। जल्दीच ओ ल इलाज बर राशि स्वीकृत हो गे, जेखर से अब वोखर पिता के डायलिसिस अउ दवा मन के खर्च म मदद मिलत हे।
उमन मुख्यमंत्री श्री विष्णु देव साय के आभार जतात कहिस के सरकार ले मिले ए आर्थिक सहायता ले वोखर पिता ल नवा जीवन मिले हे। मुजफ्फर खान के पत्नी बिल्किस बानों ह कहिस के मुख्यमंत्री के कोति ले मिले ए मदद ले ओ मन ल बड़ राहत मिले हे, अब आसानी ले वोखर पति के इलाज हो पात हे।
मुख्यमंत्री विशेष स्वास्थ्य सहायता योजना के तहत गंभीर रोग के इलाज बर 25 लाख रूपिया तक के आर्थिक सहायता देहे जाथे। बिलासपुर जिला म ए साल 131 मरीज मन ल योजना के तहत लाभान्वित होए हे।
