राज्यपाल ह छत्तीसगढ़ी अग्रवाल समाज के वेबसाइट के करिस लोकार्पण

रायपुर, 27 मई 2020। राज्यपाल सुश्री अनुसुईया उइके ह आज इहां राजभवन म छत्तीसगढ़ी अग्रवाल समाज के वेबसाइट के लोकार्पण करिन। ये बेरा म समाज के प्रतिनिधिमण्डल ह राज्यपाल ल समाज के पत्रिका ‘छत्तीसगढ़ी संगठन युग’ भेंट करिन। राज्यपाल ह पत्रिका के वार्षिक विशेषांक ’मंगल माधुरी’ के विमोचन घलोक करिन। ये बेरा म राज्यपाल ह कहिन के छत्तीसगढ़ी अग्रवाल समाज अपन दानशीलता के सेती जाने जात रहे हे। ओ मन हमेसा आगू आके दीन दुखी मन के सेवा करत हे। छत्तीसगढ़ म चिकित्सालय, शिक्षण संस्था मन बर समाज ह आगू बढ़के दान देहे हे, ए संस्थान मन के माध्यम ले कई मनखे मन के सेवा होवत हे। ये वेबसाइट के निर्माण सराहनीय काम हे। एखर माध्यम ले जादा ले जादा मनखे छत्तीसगढ़ी अग्रवाल समाज के काम मन के बारे म जान सकहीं। छत्तीसगढ़ी अग्रवाल समाज रायपुर के अध्यक्ष श्री अनुराग अग्रवाल ह बताइस के लॉकडाउन के समय समाज कोति ले 73 टन सब्जी अऊ सुखा राशन, मास्क के वितरण करे गीस। एखर संगेच समाज म विवाह म दहेज प्रथा उपर प्रतिबंध घलोक लगाइए गए हे। समाज कोति ले दान करे गए जमीन म दाउ कल्याण सिंह सुपर स्पेशिलिटी हॉस्पिटल, एम्स अऊ तेलीबांधा तालाब जइसे संस्था मन के निर्माण होय हे। समाज कमेशा कल्याणकारी काम मन बर अग्रसर रहिथे। ये बेरा म श्री अजय दानी, श्री जे.पी. अग्रवाल, श्री अरविन्द अग्रवाल उपस्थित रहिन।