रायपुर, राज्यपाल श्री विश्वभूषण हरिचंदन आज महासमुंद जिला के आदिवासी बाहुल्य गाँव बासंकुड़ा पहुंचिस अऊ ऊहां के ग्रामीण मन करा मिल के ओमन ल प्रशासन से मिलत मूलभूत सुविधा के, ओमन के आर्थिक स्थिति आदि के जानकारी लीस।
राज्यपाल श्री हरिचंदन ह गांव बासंकुडा म आयोजित कार्यक्रम म कमार जनजाति परिवार, स्व सहायता समूह के महिला अउ ग्रामीण मन से मुलाकात करिस अउ बिहान महिला स्व सहायता समूह कती ले लगाये गये स्टाल के अवलोकन करिस। महिला मन ह अपन बनाए उत्पादित करे बांस, छिंद के बने टुकनी, सजावट के सामग्री, माटी कला, टेराकोटा आर्ट ले बने सामग्रि अउ खाद्य सामग्री आदि के जानकारी दीस। ओ ह कहिस कि जिला के कलेक्टर अउ अन्य अधिकारी ए सुनिश्चित करें कि योजना के लाभ आप सब लोग मन तक पहुंचे। कोनो भी समस्या रही त कलेक्टर ल बतावा अउ जादा बडे़ समस्या रहि त मोला घलो बता सकत ह। ओ ह महिला मन से हिन्दी अउ ओडिया भाषा म आत्मीयता के संग बातचीत करिस। महिला ह राज्यपाल ल बांस ले बने टुकनी भेंट करिस।
राज्यपाल कहिस कि महासमुंद जिला छत्तीसगढ़ अउ ओडिशा के सीमावर्ती जिला हे। दूनो राज्य के निवासी भाई-भाई हे। भारत के संस्कृति अनोखा हे। सब संस्कृति के ईहां संगम होथे तेकरे ब भारत ह विश्व गुरू कहे जाथे।
ए अवसर म राज्यपाल के सचिव श्री अमृत खलखो ह तको अपन संबोधन दिस। ओ ह कहिस कि राज्यपाल पहली बार आदिवासी क्षेत्र के निवासि मन करा प्रत्यक्ष मुलाकात करे अउ योजना के क्रियान्वयन देखे ब पहुंचे हें।
कार्यक्रम म राज्यपाल कमार जनजाति के किसान मन ल उरिद बीज के मिनी किट, बैट्री स्प्रेयर, गर्भवती महिला मन ल सुपोषण किट अउ प्रधानमंत्री आवास योजना के हितग्राहि मन ल सामग्री, दिव्यांग मन ल ट्राइसाइकिल वितरण करिस। राज्यपाल परिसर म वृक्षारोपण घलो करिस।
ए अवसर म राज्यपाल के उप सचिव श्री दीपक अग्रवाल, महासमुंद कलेक्टर श्री निलेश कुमार क्षीरसागर, पुलिस अधीक्षक अउ अन्य वरिष्ठ अधिकारी, सरपंच अउ अन्य जनप्रतिनिधि संग क्षेत्र के ग्रामीण बडे़ संख्या म उपस्थित रहिस हे।
राज्यपाल श्री हरिचंदन महासमुंद जिला के कमार जनजाती मन के बीच पहुंचिस
