ग्राम मालखरौदा के रहवईया श्री गोविंद राम टंडन ल मिलिस निसुल्क मोटराइज्ड ट्राइसायकल

सक्ती, कलेक्टर श्री अमृत विकास तोपनो कोति ले जिला के अलग-अलग विभाग मन मं चलत जनकलियानकारी योजना मन ले जरूरतमंद अऊ पात्र हितग्राही मन ल जादा ले जादा लाभ पहुँचाए के निरदेस देहे गे हे। जेकर तहत समाज कल्यान विभाग के योजना मन ले जिला के कतको दिव्यांग जन मन के जिनगी बदलत हे। समाज कल्यान विभाग कोति ले संचालित ‘निसुल्क सहायक उपकरण प्रदाय योजना’ के तहत तहसील मालखरौदा के ग्राम मालखरौदा रहवइया श्री गोविंद राम टंडन, पिता गुलाब दास टंडन, उम्र 45 बछर, जेहा दूनों गोड़ ले 50 प्रतिसत अस्थि बाधित दिव्यांग हें, ओला निसुल्क मोटराइज्ड ट्राइसायकल देहे गे हे। श्री टंडन ह शासकीय मिडिल स्कूल मालखरौदा मं स्वीपर के पद मं काम करथे।
श्री टंडन ह बताइस के दिव्यांगता के सेती ओला हर दिन काम के जगा मं आए-जाए मं भारी मुस्किल के सामना करना परत रहिस। मोटराइज्ड ट्राइसायकल मिले ले अब ओखर आवागमन सुगम हो गे हे अऊ ओ ह अपन रोज के काम घलोक आसानी ले कर पावत हे। सहायक उपकरण मिले मं ओखर चेहरा मं खुसी साफ झलकत रहिस। ओ ह कहिस के ट्राइसायकल के माध्यम ले अब काम बर आना-जाना सरल हो गे हे अऊ रोजमर्रा के काम मन ल घलोक बढ़िया ढंग ले कर पावत हौं। ए सहयोग बर श्री गोविंद राम टंडन ह कलेक्टर श्री अमृत विकास तोपनो अऊ समाज कल्यान विभाग के प्रति हदय ले आभार प्रकट करिस।