महासमुंद, 12 अगस्त 2020। जिला पुलिस ह 730 ग्राम ब्राउन शुगर के संग राजस्थान जोधपुर के रहइया एक आरोपी ल गिरफ्तार करे हे। आरोपी रायपुर स्थित लोकायुक्त कार्यालय म 2008 ले चपरासी के पद म कार्यरत हे। आरोपी ले बरामद ब्राउन शुगर के कीमत एक करोड़ 46 लाख रुपिया बताये जावत हे। पुलिस के कहना हे कि ये छत्तीसगढ़ के सबले बड़का कार्रवाई हे। आरोपी ले एक ऑटोमेटिक पिस्टल 7.6 एम. एम. 2 मैग्जीन अउ दू जियत कारतूस घलो बरामद करे गे हे।
एसपी प्रफुल्ल ठाकुर, एएसपी मेघा टेम्भुरकर ह आज मंझनिया डेढ़ बजे एक पत्रकार वार्ता आयोजित करके उक्त जानकारी दीस। ओमन बताइस कि आरोपी मूलत: राजस्थान जोधपुर के रहइया हरे जोन पाकिस्तान बॉर्डर म हे। अउ ये मामला ल पाकिस्तान ले घलो जोड़ के देखे जावत हे। आरोपी शंकर वैष्णव निवासी कांसीराम नगर रायपुर ले आज बिहनिया रायपुर के डाहर ले मैस्ट्रो मैजिक वाहन म ब्राउन शुगर लेके ओडिशा खरियार रोड ले जावत रहिस कि घोड़ारी नदी मोड़ के पास म पकड़ाइस। शुरुवाती पूछताछ म आरोपी ह खुद ल क्राइम ब्रांच के अफसर बताइस। पुलिस के कहना हे कि जैसलमेर के रस्ता म पाकिस्तान के कोनो गिरोह के सदस्य हो सकत हे। लिहाजा पुलिस ह ये मामला म छानबीन करत हे। आरोपी के खिलाफ म धारा 21सी, 22 अउ 25 आर्म्स एक्ट के तहत कार्रवाई चलत हे। ये कार्रवाई म एसडीओपी नारद सूर्यवंशी, साइबर सेल प्रभारी संजय राजपूत, योगेश सोनी, नवधा राम खांडेकर आदि के सहयोग रहिस।
