धमतरी ले देशभर म गूंजही ग्रीन आतिशबाजी: 100 ले जादा महिला मन ल मिलीस रोजगार

धमतरी, स्वच्छ आतिशबाज़ी के नवा केंद्र बनके धमतरी पूरा प्रदेश अऊ देश ल प्रेरणा देहे जात हे। ये पहल रोजगार अऊ आत्मनिर्भरता ल बढ़ावा देही, संगेच पर्यावरण संरक्षण अऊ सुरक्षित तिहार के दिशा म घलोक ऐतिहासिक कदम साबित होही।
धमतरी जिला के ग्राम चटोद म महिला मन अब पारंपरिक पटाखा के जगा पर्यावरण अनुकूल ग्रीन पटाखा के निर्माण म जुटे हें। ये पहल स्वच्छ अऊ सुरक्षित दिवाली के रद्दा दिखावत हे, संग म ग्रामीण महिला मन बर आत्मनिर्भरता अऊ रोज़गार के नवा दुवारी घलोक खोलत हे।
कलेक्टर धमतरी ह श्री गणेशा फायरवर्क्स यूनिट के निरीक्षण करिन। उमन महिला मन ले बात करके उत्पादन प्रक्रिया अऊ गुणवत्ता के जानकारी लीन अऊ मौका म ग्रीन पटाखा चलाके ओखर सुरक्षा अऊ प्रभाव के अनुभव घलोक करिन। ए यूनिट ल पाँच एकड़ जमीन लीज म उपलब्ध कराए गए हे। निरीक्षण के समय उमन प्रबंधन ल कड़ा निर्देश दीन के परिसर म अग्नि शमन के ठोस व्यवस्था, समय-समय म मॉक ड्रिल अऊ ज्वलनशील पदार्थ मन उपर पूरा प्रतिबंध ठउका करे जाए। उमन  कहिन के चटोद म स्थापित ये यूनिट ‘लोकल ले वोकल’ अऊ महिला सशक्तिकरण के सशक्त मिसाल हे। एखर से ग्रामीण महिला मन ल आत्मनिर्भर बने के अवसर मिलत हे, उहें समाज ल स्वच्छ अऊ सुरक्षित विकल्प प्राप्त होवत हे।
यूनिट के सेल्स हेड श्री आशीष सिंह ह बताइस के ग्रीन पटाखा म बारूद के परयोग नइ होवय, जेखर से ये पूरा सुरक्षित रइथे अऊ प्रदूषण घलोक नइ फैलाय। अभी हाल म इहां लगभग 100 ले जादा महिला मन काम करत हें, जे मन ल स्थायी रोजगार प्राप्त होय हे। अवइया समय म विवाह समारोह अऊ आन आयोजन मन बर घलोक ग्रीन पटाखा के कई ठन किस्म उपलब्ध कराए जाही।