तेंदूपत्ता संग्रहण वनांचल म बनिस रोजगार अऊ आय के जरिया

10 लाख ले जादा संग्राहक परिवार मन ल 596 करोड़ के सीधा भुगतान
मुख्यमंत्री बोलिन – तेंदूपत्ता संग्राहक मन के मेहनत के हर रुपया ऊंखर हाथ तक पहुँचना हमर प्राथमिकता
रायपुर, छत्तीसगढ़ के वनवासी अंचल म ए साल घलोक तेन्दूपत्ता संग्रहण के कार्य  तेज़ी ले चलत हे। राज्य के 902 प्राथमिक लघु वनोपज सहकारी समिति मन के माध्यम ले 10,631 फड़ मन म ये काम होवत हे। असमय हवा, तूफान, बारिश अऊ ओलावृष्टि के कारण ए साल तेन्दूपत्ता फसल ल नुकसान जरूर पहुँचे हे, फेर संग्राहक परिवार मन के मेहनत अऊ सरकार के प्रतिबद्धता ह ए चुनौती ल अवसर म बदल देहे हे।
अब तक के रिपोट के मुताबिक, 10 लाख ले जादा संग्राहक परिवार मन ह 10.84 लाख मानक बोरा तेन्दूपत्ता फड़ म बेचे हे, जेखर मूल्य लगभग 596 करोड़  रुपिया हे। ये राशि डीबीटी के माध्यम ले सीधा संग्राहक मन के खाता म जमा करे जाही। एखर बर सॉफ़्टवेयर म डाटा प्रविष्टि के प्रक्रिया ज़िला यूनियन मन कोति ले चालू कर दे गए हे।
मुख्यमंत्री श्री विष्णु देव साय ह कहिन के तेन्दूपत्ता छत्तीसगढ़ के आदिवासी अंचल बर केवल वनोपज नो हे, भलुक आजीविका के आधार हे। हमर सरकार के प्राथमिकता हे कि संग्राहक मन ल उंखर मेहनत के पूरा मूल्य समय म अऊ पारदर्शी तरीका ले मिलय। तेन्दूपत्ता संग्रहण ले जुड़े हर परिवार के जीवन म आर्थिक सुरक्षा अऊ आत्मनिर्भरता के अहसास होवय, एखर बर हम पूरा प्रतिबद्धता ले काम करत हन। हमन तेंदूपत्ता  संग्रहण पारिश्रमिक दर ल 4000 मानक बोरा ले बढ़ाके 5500 रुपिया करे हन, जेखर से संग्राहक मन ल पहिली के तुलना म अब जादा लाभ मिले लगे हे।