जल संरक्षण बर छोटे तालाब करव विकसित
संभागायुक्त श्री चुरेन्द्र ह अतिक्रमण उपर सख्त कार्रवाही के दीन हुकुम
दुर्ग संभाग के सबो कलेक्टर मन 15 अप्रेल तक प्रभावी कार्ययोजना बनाए के हुकुम
शमशान घाट, कब्रिस्तान, सड़क, तालाब व तालाब के मेड़, शासकीय परिसर, खेल- मैदान अऊ हाट बाजार ले अतिक्रमण हटाए के हुकुम
दुर्ग 12 मार्च 2020। संभागायुक्त श्री जी. आर. चुरेन्द्र ह ग्रामीण अऊ शहरी क्षेत्र मन म स्थित लोक प्रयोजन के जमीन मन ले अतिक्रमण हटाए बर सख्त कार्रवाही करे के हुकुम देहे हें। उमन कहिन के लोक प्रयोजन जइसे शमशान घाट, कब्रस्तान, गौठान, सड़क, रद्दा, तालाब व तालाब के मेड़, शासकीय परिसर, खेल मैदान, स्टेडियम, हाट बाजार के स्थल आदि शासकीय संपत्ति हे। ए खातिर ए जगा ले अतिक्रमण हटाके बेहतर प्रबंधन करे जा सकत हे। उमन कहिन कि ए क्षेत्र मन ल पौध रोपण करके ग्रीन जोन या आक्सीजोन के रूप म विकसित करे जा सकत हे। संगेच इहां म जल संरक्षण बर छोटे तालाब अऊ डबरी बनाय जा सकत हे। जऊन क्षेत्रवासी मन बर बिकट फायदेमंद साबित होही। उमन संभाग के सबो पांच जिला दुर्ग, बेमेतरा, बालोद, राजनांदगांव अऊ कवर्धा के कलेक्टर मन ल अर्धशासकीय पत्र जारी करके लोक प्रयोजन के शासकीय जमीन मन ले अतिक्रमण हटाए बर 15 अप्रेल तक प्रभावी कार्ययोजना तियार करे ल कहे हें। श्री चुरेन्द्र ह हुकुम देहे हें कि अवइया 30 मई तक शत-प्रतिशत अतिक्रमण हटाना हे। एखर बर युद्ध स्तर म काम करना होही।
