गरियाबंद, खेती बर सिंचाई क्षेत्र के रकबा म बढ़ोतरी करे के उद्देश्य ले शासन कोति ले हरित कांति विस्तार योजना के तहत गरियाबंद जिला म नलकूप खोदाए अऊ पंप लगाए के काम पूरा करे जात हे। जेखर से किसान अपन खेत मन म एक ले जादा फसल लेके अऊ फसल के समय म सिंचाई करके उत्पादन ल बढ़ा सकत हें। शासन कोति ले राज्य म उपलब्ध भू-जल के नलकूप ले समुचित उपयोग अउ फसल मन ल सिंचाई सुविधा उपलब्ध कराके उत्पादकता अउ फसल सघनता म बढ़ोतरी करे के उद्देश्य ले ये योजना चलाए जात हे।
जिला के फिंगेश्वर विकासखंड के ग्राम बारूला निवासी महिला किसान हेमिन बाई अपन खेती के 2.09 हेक्टेयर रकबा जमीन म नलकूप खोदवा के अऊ पंप लगवा के दुहरी फसल लेहे म कामयाबी हासिल करे हे। हेमिन बाई ह बताइस कि ये योजना किसान मन बर अड़बड़ उपयोगी हे। नलकूप लगे के बाद ओ ल कृषि विभाग कोति ले अनुदान राशि 30 हजार रूपिया के भुगतान करे गए हे। पहिली वो अपन खेती जमीन म एके पईत धान के खेती कर पात रहिस फेर ये योजना ले नलकूप चाोदवा के पंप लगवाए ले अपन खेती जमीन म अब दू पईत फसल के पैदावारी लेवत हे। जेखर से वोकर आमदनी पहिली के तुलना म अब करीबन 83 हजार तक के बढ़ोतरी होए हे।