नरवा संवर्धन ले बाढि़स जमीन के जलस्तर, किसान मन के बाढि़स उपज

रायगढ़, जिला म सुराजी गांव योजना अंतर्गत नरवा संवर्धन के काम ल सरलग करे जात हे। जेखर से जमीन के जलस्तर सुधार अऊ पानी बहाव कम करके आसपास के जमीन के नमी म बढ़ोतरी अऊ जमीन जलस्तर म बढ़ोतरी के काम करे जात हे। जेखर तहत ग्राम कुशवाबहरी म गेबियन स्ट्रक्चर, लूज बोल्डर, डाईक, अर्दन गली प्लग, कुआं, तालाब गहरीकरण, वृक्षारोपण आदि काम करे गए हे। साल 2019-20 म नरवा संवर्धन अंतर्गत 1.8 किलोमीटर के काम करे गीस। जेखर से जमीन के सिंचित क्षेत्र म 14 एकड़ के विस्तार होइस। एखर से ग्राम के 13 किसान मन ल लाभ मिलीस। लाभान्वित किसान मन ह एकर प्रभाव ल देखत नरवा विकास ले संबंधित काम मन के विस्तार करे के मांग करे हें।
कुशवाबहरी म सुराजी गांव योजना अंतर्गत गेबियन स्ट्रक्चर के 02 काम, लूज बोल्डर के 03, डाईक के 03, अर्दन गली प्लग के 01, कुंआ के 01, तालाब गहरीकरण के 01 अऊ वृक्षारोपण के 05 जइसन कुल 17 स्वीकृत काम ल पूरा करे गीस। जेखर बर 14.886 लाख के स्वीकृत करे गीस, जेमां 10.231 लाख व्यय करे गीस। ये काम ह किसान मन के खरीफ फसल बर काफी सहायक सिद्ध होइस। एखर अलावा जलस्तर म बढ़ोतरी होए ले जेन बोर पहिली सुखा जात रहिस, वो अभी हाल म घलोक चलत हे। जेखर से किसान अब रबी के आन फसल लेहे बर घलोक प्रोत्साहित होवत हें।
ग्राम कुशवाबहरी निवासी संत राम राठिया के बताती, नरवा संवर्धन ले पहिली धान के फसल सूखा जात रहिस, पानी के समस्या बने रहत रहिस। ये पइत फसल बने होए के संगेच जमीन म नमी होए ले रबी म उड़द अऊ दलहन के फसल लेहे के योजना हे। उहीच गांव के डोरी लाल राठिया कहिथे, नाला के आस-पास के फसल बने होइस हे, जेखर से वोखर संग आन किसान मन ल घलोक एकर लाभ मिले हे। अवइया दिन म आन नरवा विकास के काम ल विस्तार देना चाही, जेखर से जादा ले जादा किसान मन ल लाभ मिल सकय। गंगा राम के बताती नरवा संवर्धन के काम ले आसपास के 20 एकड़ म जेन फसल कमजोर होत रहिस उहां ये साल बढि़या होय हे। एखर अलावा नरवा संवर्धन के काम ले मनखे मन ल रोजगार घलोक मिले हे।