जल संवर्धन के दिशा म मील के पत्थर साबित होही भू-जल संवर्धन मिशन – श्री विष्णु देव साय

मुख्यमंत्री ह भू-जल संवर्धन मिशन के करिन शुभारंभ, भू-जल अऊ वर्षा जल संरक्षण म शहर मन म होही प्रभावी काम
हाइड्रोलॉजिस्ट्स, कॉलोनाइजर्स, उद्योग समूह, राज्य शासन के कई ठन विभाग अऊ खांटी जानकार मन ह जल संरक्षण उपर करिन मंथन
वर्षा जल के संचय अऊ संरक्षण भू-जल स्रोत मन ल रिचार्ज करे म बेहद अहम – उप मुख्यमंत्री श्री अरुण साव
रायपुर, मुख्यमंत्री श्री विष्णु देव साय ह काली पंडित दीनदयाल उपाध्याय भू-जल संवर्धन मिशन (शहरी) के शुभारंभ करिन। एखर तहत प्रदेश के सबो नगरीय निकाय मन म भू-जल अऊ वर्षा जल के संरक्षण-संवर्धन बर मिशन मोड म काम करे जाही। मुख्यमंत्री श्री साय ह नगरीय प्रशासन अउ विकास विभाग कोति ले रायपुर के पंडित दीनदयाल उपाध्याय ऑडिटोरियम म आयोजित शुभारंभ कार्यक्रम म मिशन के ब्रोशर के विमोचन अऊ एखर तैयार वीडियो घलोक लॉन्च करिस। उमन राज्य के नौ नगरीय निकाय मन म सेवाकाल के समय दिवंगत 18 कर्मचारी मन के परिजन मन ल अनुकंपा नियुक्ति पत्र घलोक सौंपिन।
उप मुख्यमंत्री अउ नगरीय प्रशासन अउ विकास मंत्री श्री अरुण साव, जल संसाधन अउ रायपुर जिला के प्रभारी मंत्री श्री केदार कश्यप, विधायकगण सर्वश्री राजेश मूणत, सुनील सोनी, मोती लाल साहू, पुरन्दर मिश्रा, गुरू खुशवंत साहेब, इन्द्र कुमार साहू, रायपुर नगर निगम के महापौर श्रीमती मीनल चौबे अऊ वाटरमैन के नाम ले मशहूर श्री राजेन्द्र सिंह घलोक विशिष्ट अतिथि के रूप म शुभारंभ कार्यक्रम म सामिल होइन। भू-जल संवर्धन मिशन के शुभारंभ के मौका म आयोजित कार्यशाला म हाइड्रोलॉजिस्ट्स, कॉलोनाइजर्स, उद्योग समूह, वन विभाग, लोक निर्माण विभाग, लोक स्वास्थ्य यांत्रिकी विभाग अउ जल संसाधन विभाग के अधिकारी मन ह जल संरक्षण, एखर उपाय अऊ परिणाम मन उपर मंथन करिन। उप मुख्यमंत्री श्री अरुण साव अऊ भारत के वाटरमैन के नाम ले प्रसिद्ध श्री राजेन्द्र सिंह ह घलोक कार्यशाला म अपन विचार रखिन अउ प्रतिभागी मन के सवाल मन के जवाब घलोक दीन। गुजरात के सूरत म्युनिसिपल कार्पोरेशन के टीम ह उहां वर्षा जल के संचय अऊ भू-जल रिचार्ज बर होवत काम मन के बारे म बताईन।
मुख्यमंत्री श्री विष्णु देव साय ह पंडित दीनदयाल उपाध्याय भू-जल संवर्धन मिशन (शहरी) के शुभारंभ कार्यक्रम ल संबोधित करत कहिन क जल के बिना जीवन के कल्पना घलोक नइ करे जा सकय। जल के उपलब्धता के चिंता करत नगरीय प्रशासन विभाग कोति ले ए महत्वाकांक्षी मिशन के शुरूआत करे जात हे। एखर बर मैं उप मुख्यमंत्री श्री अरुण साव अऊ नगरीय प्रशासन विभाग ल धन्यवाद देत हंव। उमन उम्मीद जताईन के वर्षा जल अऊ भू-जल के संरक्षण अउ संवर्धन म ये मिशन मील के पत्थर साबित होही।
मुख्यमंत्री श्री साय ह कहिन कि प्रदेश म जल संरक्षण बर कई उपाय करे जात हे। पंचायत अउ ग्रामीण विकास विभाग कोति ले गांव वाले मन के सहभागिता ले ‘मोर गांव मोर पानी’ अभियान संचालित करे जात हे। उमन कहिन के दुनों अभियान मन के मकसद एके हे। प्रधानमंत्री श्री नरेन्द्र मोदी के आह्वान म जल संरक्षण बर पूरा देश म अमृत सरोवर के रूप म नवा तालाब के निर्माण अऊ जुन्ना तालाब मन के जीर्णोद्धार करे जात हे। आज मिशन के शुभारंभ के मौका म चार घंटा तक खांटी जानकार मन ह एखर प्रभावी क्रियान्वयन उपर गोठबात ककरिन। श्री साय ह कहिन के जल ल लेके कहूं हम अभी सचेत अऊ सावधान नइ होबो त अवइया समय मुश्किल होही।
उप मुख्यमंत्री श्री अरुण साव ह शुभारंभ कार्यक्रम म कहिन के वर्षा जल के संचय, संरक्षण अऊ भू-जल ल रिचार्ज करे के उपाय मन उपर खांटी जानकार मन ह अभी चार घंटा तक चर्चा करे हें। वाटरमैन श्री राजेन्द्र सिंह अऊ सूरत नगर निगम के खांटी जानकार मन के मार्गदर्शन घलोक मिले हे। उमन कहिन कि ए गोठ के समय जल के संरक्षण अऊ संवर्धन के काम मन ल स्कूली पाठ्यक्रम म सामिल करे अऊ राज्य म वर्षा के पैटर्न के मुताबिक फसल चक्र अपनाए के बात प्रमुखता ले आए हे। श्री साव ह कहिन के अवइया समय म शहर मन म पेयजल अऊ आन जरूरत मन बर पानी के व्यवस्था के चुनौती मन ल देखत नगरीय प्रशासन विभाग कोति ले ए मिशन ल चालू करे जात हे। उमन कहिन के छत्तीसगढ़ म भरपूर बारिश होथे। एखर सावधानीपूर्वक संचय अऊ संवर्धन ले हम पानी के दिक्कत ल दूर कर सकत हन।
जल संसाधन मंत्री श्री केदार कश्यप ह भू-जल संवर्धन मिशन के शुभारंभ म खुशी जतात कार्यक्रम म कहिन के ए मिशन के तहत अनुकरणीय काम होही, अइसन ओ मन ल उम्मीद हे। मुख्यमंत्री श्री विष्णु देव साय के अगुवई म जनभागीदारी ले जल संचय करे म छत्तीसगढ़ ल पूरा देश म पहिली स्थान मिले हे। जल के महत्व ल देखत स्रोत मन के पुनर्भरण अऊ रिचार्ज करे बर गंभीरता ले काम करे के जरूरत हे। जल संसाधन विभाग घलोक ए म गंभीरता ले काम करत हे। नगरीय प्रशासन अउ विकास विभाग के सचिव डॉ. बसवराजु एस., संचालक श्री आर. एक्का अऊ राज्य शहरी विकास अभिकरण (SUDA) के सीईओ श्री शशांक पाण्डेय संग सबो नगर निगम के महापौर, सभापति अऊ आयुक्त, नगर पालिका अऊ नगर पंचायत मन के अध्यक्ष अउ मुख्य नगर पालिका अधिकारी, नगरीय निकाय मन के अभियंता, जल विशेषज्ञ, समाजसेवी, स्वयंसेवी संगठन मन के प्रतिनिधि, नगरीय प्रशासन विभाग अऊ सुडा के अधिकारी बड़ संख्या म शुभारंभ कार्यक्रम म मौजूद रहिन।