साग-भाजी के संग मूंगफली अऊ शकरकंद के खेती ले बाढि़स महिला मन के आत्मविश्वास

अम्बिकापुर, अम्बिकापुर जनपद अंतर्गत आदर्श गोठान सोहगा म स्व सहायता समूह के महिला मन ह साग भाजी के संगेच मूंगफली, शकरकंद अऊ जिमीकंद के खेती करत हें। गोठान म खेती लहलहात हे एला देखके बनेच आमदनी मिले के भरोसा हे जेखर से बाड़ी विकास बर महिला मन के आत्मविश्वास बाढ़े हे।
संतोषी स्व सहायता समूह के महिला मन ह बताइस के गोठान म बारिश ले पहिली टमाटर, बैगन, बरबट्टी मिर्ची के खेती के गए रहिस। अब करेला लगाय के तैयारी करे जात हे। उमन बताइन के करीबन 25-25 डिसमिल म शकरकंद, जिमीकंद के खेती करे गए हे। पौधा मन के विकास ले बने उपज होए के उम्मीद हे। एखर संगेच मुर्गी पालन अऊ बटेर पालन घलोक करे जात हे।
उमन बताइन के आधुनिक पद्धति ले मुर्गी पालन बर थ्री टियर केज घलोक इहां स्थापित करे गए हे जेमा 4 सितंबर 2021 ले 250 उन्नत किसिम के लेयर बर्ड पोंसे गए हे। अब मुर्गि मन ह अंडा देना घलोक शुरू कर देहे हे। जानबा हे के सुराजी गांव योजना के तहत गोठान मन ल मल्टी एक्टिविटी सेंटर के रूप म विकसित करके समूह के महिला मन ल आर्थिक रूप ले सुदृढ करे जाथे। गोठान मन म बाड़ी विकास अऊ चारागाह विकास बर हर एक गोठान म दू-दू बोर करे गए हे। एखर संगेच रीपा के तहत औद्योगिक इकाईयां घलोक स्थापित करे जात हे।