जीआरपी के वाहन पेड़ ले टकराईस, 5 जवान के हालत गंभीर

रायपुर, 1 फरवरी 2021। राजधानी रायपुर के तेलीबांधा थाना इलाका के छेरीखेड़ी म जीआरपी (राजकीय रेलवे पुलिस) रायपुर के वाहन सड़क हादसा के शिकार होगे. तेज रफ्तार कार अनियंत्रित होके पेड़ ले जा टकराईस. ये हादसा म कार म सवार जीआरपी के 5 जवान गंभीर रूप ले घायल होगे. जोन मन ल इलाज बर मेकाहारा अस्पताल म भर्ती कराये गए हे. मिले जानकारी के अनुसार जीआरपी रायपुर के वाहन महासमुंद के पटेवा स्थित फायरिंग रेंज ले रायपुर डाहर आवत रहिस. तभे राँग साइड ले आवत वाहन ल बचाये के चक्कर म अनियंत्रित होके पेड़ ले टकरागे. हादसा अतना भयावह रहिस कि कार के आगु के हिस्सा के परखच्चा उड़गे. घटना के सूचना मिलत ही पुलिस के टीम मउका म पहुंचगे. ये हादसा म जीआरपी के आरआई कुलदीप मिंज, हेड कांस्टेबल मनमोहन सिंग, कांस्टेबल पाण्डु कुमार महिपाल समेत 5 जवान गंभीर रुप ले घायल होय हे. जोन मन ल गंभीर चोट आये हे. जेखर ले वो मन लहुलूहान होगे. घायल मन ल एम्बुलेंस के मदद ले मेकाहारा अस्पताल म भर्ती कराये गए हे, जिहां इलाज जारी हे.