गृह मंत्री ह दुर्ग के ग्रामीण क्षेत्र मन के करिस सघन दौरा

दुर्ग, गृह मंत्री श्री ताम्रध्वज साहू ह आज दुर्ग ब्लॉक के बहुत अकन गांव मन के दौरा करिन अऊ इहां भूमिपूजन अऊ लोकार्पण के बहुत अकन विकास काम के शुभारंभ करिन। गृह मंत्री ह ये बेरा म कहिन कि आज जिला के कई ठन गांव मन के भ्रमण के उद्देश्य मनखे मन ल शासन के योजना मन के जानकारी देना हे संगेच योजना मन के जमीनी क्रियान्वयन के स्थिति घलोक जानना हे। श्री साहू आज हनोदा, भानपुरी, कुथरेल, अंडा, रिसामा बोरीगारका आदि गांव म गीन। उमन गांव वाले मन ले चर्चा म कहिन कि मुख्यमंत्री श्री भूपेश बघेल के सरकार ह पदभार ग्रहण करतेच सबले पहिली निर्णय कर्जमाफी अऊ 2500 रूपिया म धान खरीदी के लीन। मुख्यमंत्री के ये निर्णय ले कृषक मन म खुशी के लहर आए हे। खेती किसानी जऊन बरसों ले पिछड़त रहिस, अब अरसा बाद किसान मन बर आर्थिक लाभ के जरिया बने हे। खरीफ के रकबा बाढ़े हे, जऊन मनखे खेती किसानी छोड़ दे रहिन अब खेती के तरफ वापस आवत हें।