जांच म 1.64 करोड़ रूपिया नकद अऊ 400 ग्राम सोना जब्त
रायपुर, राज्य जीएसटी विभाग ह जीएसटी एनालिटिक्स अऊ इंटेलिजेंस नेटवर्क अऊ जीएसटी प्राईम पोर्टल के उपयोग करके बोगस फर्म अऊ बोगस बिल तैयार करइया सिंडिकेट के पता लगाए हे। एकर मास्टर माइंड मो. फरहान सोरठिया हे, जेन जीएसटी के कर सलाहकार के रूप म काम करत रहिस। ए सिंडिकेट के सेती राज्य ल हर महीना करोड़ों रूपिया के टेक्स के नुकसान होत रहिस।
राज्य जीएसटी के बी.आई.यू. टीम ए प्रकरण म एक महिना ले काम करत रहिस। मास्टर माइंड मो. फरहान सोरठिया के ऑफिस म 12 सितंबर के जांच करे गी। जांच के समय इहां ले 172 फर्म मन के बारे म जानकारी मिलीस। फरहान ह अपन 5 ऑफिस स्टॉफ ल फर्म मन के पंजीयन कराए, रिटर्न फाईल करे अऊ ई-वे बिल तैयार करे बर रखे रहिस। एखर अलावा मास्टर माइंड के आफिस ले बोगस पंजीयन बर किरायानामा, सहमति पत्र, एफिडेविट तैयार करे के घलोक साक्ष्य मिले हे।
26 बोगस फर्म मन ले ही 822 करोड़ के ई-वे बिल जनरेट करे गीस, जबकि रिटर्न म 106 करोड रूपिया के ही टर्नओव्हर देखाय गए हे। केवल ए फर्म मन ले ही राज्य ल 100 करोड़ रूपिया के जीएसटी के नुकसान होए के प्रारंभिक आंकलन हे। इहां ले मिले कागद मन के मुताबिक राज्य के भीतर अऊ पंजाब, असम, मणिपुर, ओडिसा म घलोक पंजीयन लेहे गए हे। इहां पंजीयन बर बोगस कागद जइसे किरायानामा अऊ सहमति पत्र घलोक तैयार करे जात रहिस। ए फर्म मन के माध्यम ले बोगस सप्लाई बिल अऊ ई-वे बिल जारी करे जात रहिस।
मो. फरहान के बोगस फर्म मन ले संबंधित कागद लुकाए के सूचना म विभाग ह 17 सितंबर के फरहान के कका मो. अब्दुल लतीफ सोरठिया के घर म सर्च (जांच) करे रहिस। उहां अधिकारी मन ल 1 करोड़ 64 लाख रूपिया के नोट अऊ 400 ग्राम सोना के 4 बिस्किट मिले रहिस। विभाग के अधिकारी मन ह एला जब्त कर के आयकर विभाग ल सूचना दे देहे हे।
जीएसटी अधिकारी मन कोति ले ए फर्म मन ले करोड़ों रूपिया के जीएसटी फ्रॉड के राशि के गणना करे जात हे। ए प्रकरण म कई ब्रोकर, स्क्रैप डीलर अऊ इनपुट टैक्स क्रेडिट के लाभ लेवइया कम्पनी मन घलोक विभाग के जांच के दायरे म हे। राज्य कर विभाग कोति ले मामला के गहन जांच करे जात हे अऊ आगू के विधिक कार्यवाही प्रगति म हे।
करोड़ों रूपिया के जीएसटी चोरी के खुलासा: 170 ले जादा बोगस फर्म बनाके करिस जीएसटी चोरी
