जीएसटी सुधार आमजनता अऊ व्यापार जगत बर लाभकारी- वित्त मंत्री ओ.पी. चौधरी

रायपुर, केंद्रीय वित्त मंत्री श्रीमती निर्मला सीतारमण के अध्यक्षता म आज नई दिल्ली म जीएसटी काउंसिल के 56वां बैठक आयोजित होइस। ए महत्वपूर्ण बैठक म छत्तीसगढ़ सरकार के प्रतिनिधित्व करत वित्त मंत्री श्री ओ.पी. चौधरी ह सक्रिय रूप ले भागीदारी करिन।
वित्त मंत्री श्री चौधरी ह बताइन के बैठक म जीएसटी प्रणाली म सुधार ले जुड़े बहुत अकन विषय मन उपर विस्तार ले विचार-विमर्श होइस। उमन कहिन के प्रस्तावित सुधार आम नागरिक मन ल सहूलियत देही, व्यापार जगत ल गति देही अऊ देश के अर्थव्यवस्था म नवा ऊर्जा के संचार करही।
उमन ए बेरा म कहिन के जीएसटी सुधार केवल कर संरचना के सरलीकरण भर नो हे, बल्कि ये इज ऑफ डूइंग बिज़नेस ल मजबूत करे अऊ राज्य अऊ देश के वित्तीय स्थिरता ठउका करे के घलोक माध्यम हे।
ये उल्लेखनीय हे के स्वतंत्रता दिवस के अवसर म लाल किला ले प्रधानमंत्री श्री नरेंद्र मोदी ह जीएसटी म व्यापक सुधार खातिर आह्वान करे रहिन। आज आयोजित ये बैठक ओ संकल्प ल साकार करे के दिशा म एक ऐतिहासिक अऊ ठोस कदम साबित होए हे।
बैठक म कई ठन राज्य के मुख्यमंत्री अऊ वित्त मंत्रीगण, राजस्व विभाग के सचिव, केंद्रीय अप्रत्यक्ष कर अऊ सीमा शुल्क बोर्ड (CBIC) के अध्यक्ष व सदस्य अऊ वित्त मंत्रालय के वरिष्ठ अधिकारी उपस्थित रहिन।