मुख्यमंत्री श्री विष्णु देव साय ह जीएसटी बचत तिहार के बीच ट्रैक्टर शोरूम पहुंचके किसान मन ले करिन मयारूक गोठ-बात
रायपुर, मुख्यमंत्री श्री विष्णु देव साय आज जीएसटी बचत तिहार के बीच उदुपहा जांच म देवपुरी स्थित ट्रैक्टर शोरूम पहुंचिन। श्री साय ह इहां किसान मन ले मयारूक गोठ-बात करके जीएसटी कटौती म उंखर प्रतिक्रिया अऊ खरीदी म होए बचत के जानकारी लीन। मुख्यमंत्री श्री साय ह शोरूम म ट्रैक्टर अऊ हार्वेस्टर बिसाए आए किसान मन ल चाबी सौंपके शुभकामना दीन।
मुख्यमंत्री श्री साय ह अभनपुर के बिरोदा के रहवइया श्री रवि कुमार साहू ल ऊंखर नवा हार्वेस्टर के चाबी सौंपीन। एबेरा म खुशी व्यक्त करत श्री रवि साहू ह कहिस, “मै ह सपना म घलोक नइ सोचे रहेंव के मैं नवा हार्वेस्टर बिसाहूं। मैं सेकेंड हैंड हार्वेस्टर बिसाए के बारे म सोचे रहेंव। जीएसटी तिहार म नवा हार्वेस्टर बिसाए म मोला पूरा 2 लाख रुपिया के बचत होए हे। किसान मन के चिंता के समाधान हमार संवेदनशील प्रधानमंत्री मोदी जी अऊ किसानहितैषी मुख्यमंत्री श्री विष्णु देव साय जी ही कर सकत हें। मुख्यमंत्री जी ह खुद मोला मोर नवा हार्वेस्टर के चाबी सौंपीन अऊ मोर से मया लगा के बात करिन। मैं ह ओ मन ल बताएंव के मोर पास दू एकड़ खेत हे अऊ अब हार्वेस्टर आए ले मैं गांव म साझेदारी ले अऊ जादा खेती कर पाहूं।” श्री रवि ह जीएसटी म कटौती खातिर प्रधानमंत्री श्री नरेन्द्र मोदी के आभार जताए हे।
मुख्यमंत्री श्री साय ह अभनपुर कोलर ले आए वरिष्ठ किसान श्री ज्ञानिक राम साहू ल ऊंखर नवा ट्रैक्टर के चाबी सौंपीन। मुख्यमंत्री ले गोठियावत श्री साहू ह बताइन के जीएसटी म कटौती के बाद नवा ट्रैक्टर के खरीदी म ओ ल पूरा 60 हजार रुपिया के बचत होए हे। वो ह कहिस के ए बचत ले ओखर परिवार देवारी तिहार ल अऊ बने सहिन मना सकही।
ट्रैक्टर शो रूम के प्रोप्राइटर श्री अशोक अग्रवाल ह मुख्यमंत्री ले बात करत बताइस के जीएसटी म कटौती के सेती बिक्री म इज़ाफ़ा होवत हे अऊ ग्राहक मन के उछाह बाढ़े हे। वो ह कहिस, “पहिली जेन ट्रैक्टर 10.25 लाख रुपिया के आवय, वो अब 9.75 लाख रुपिया म उपलब्ध हे, जेखर से किसान मन ल 50 हजार रुपिया के बचत होवत हे। अइसनहे 7.62 लाख के ट्रैक्टर अब 7.21 लाख अऊ 6.51 लाख के ट्रैक्टर अब 6.11 लाख रुपिया म मिलत हे। कीमत म कटौती अऊ फेस्टिवल डिस्काउंट ले किसान मन के बड़का बचत होवत हे। जीएसटी दर घटे के बाद हार्वेस्टर घलोक सस्ता हो गे हे।”
