गुहादास के आमदनी होवत हे बढ़िया, बाड़ी विकास ले मिलत हे खुसी

गांव के आन किसान मन बर घलोक बनिन प्रेरणा

रायपुर, सोनपुरी म रहइया किसान गुहादास ल सबो जानत हें। आखिर जानहीं काबर नहीं ! गुहादास ह कुछ कामे च अइसन कर देखाये हें कि गांव के मनखे ओला जानथें। सोनपुरी गांव म जइसे ही कोनो प्रवेश करथें, गांव के मनखे मन के नजर गुहादास के बाड़ी म फैले हरियाली म परथे। गांव म प्रवेश बर जऊन पक्की सड़क हे ओखर शुरूआत म ही गुहादास के बाड़ी सड़क के किनारे हे। हाल ही के गर्मी के दिन म घलोक कुछ अइसनहे नजारा रहिस। आसपास तो सूखा अऊ गर्मी के
माहौल रहिस फेर किसान गुहादास के बाड़ी हरी-हरी सब्जि मन ले गुलजार रहिस। उलटा मौसम म हरियाली अऊ बाड़ी ले उत्पादित बाजार ल जाती सब्जि मन गांव के आन किसान मन बर एक प्रेरणा बन गए हे। प्रदेश के मुखिया श्री भूपेश बघेल कोति ले सुराजी गांव योजना के तहत गांव-गांव म बाड़ी विकास म दे जात संदेश के असर घलोक किसान मन म हे। शायद इही सेती गांव म बाड़ी के जरिये कुछ कमाई करके मेहनतकश किसान आत्मनिर्भर बनत हे।
गुहादास के बाड़ी ले हफ्ता म 40 ले 50 किलों कुंदरू, 20 ले 30 किलों ग्वारफल्ली, करेला 10 ले 15 किलो,भाजी 20 किलो संग आन सब्जी के उत्पादन होथे। गर्मी के मौसम म सब्जि मन ले कमाई करइया किसान अब मानसून के दस्तक के संग नवा सीजन के सब्जि लेहे के तैयारी करत हे।

विकास के कहिनी हिन्‍दी म ये कड़ी ले पढ़व